Кӑҫал телейлӗ ачалӑх ҫулталӑкне халалласа республикӑра чылай мероприяти йӗркелеҫҫӗ. Акӑ, иртнӗ эрнере И.Н.Ульянов ячӗллӗ Чӑваш патшалӑх университечӗн культура керменӗнче «Вӗҫев» («Взлет») творчество фестивалӗн гала-концерчӗ иртнӗ. Ку мероприятие Пӗтӗм Раҫҫейри ачасемпе ҫамрӑксен «Движение вверх» обществӑпа патшалӑх юхӑмӗн пуҫарӑвӗпе йӗркеленӗ.
Фестивале пирӗн округри Комсомольски 1-мӗш вӑтам шкулӗнче вӗренекенсем те хастар хутшӑннӑ. Унӑн малтанхи тапхӑрӗсенче пысӑк пултарулӑх кӑтартнӑ, хӑйсем хатӗрленӗ номерсемпе гала-концерта хутшӑнма тивӗҫ пулнӑ. Ачасем унтан пысӑк ҫитӗнӳсемпе таврӑннӑ. Кунта та жюри вӗренекенсен ӑсталӑхне пысӑка хурса хакланӑ. «Художественное слово» номинацире Ульяна Степанова чӑвашла сӑвӑ вуласа I степеньлӗ лауреат пулса тӑнӑ. «Танцевальное направление» номинацире шкулти 7-мӗш кадет класӗнче вӗренекенсем 2-мӗш, 5—6-мӗш кадет класӗсенче пӗлӳ пухакансем 3-мӗш вырӑнсем йышӑннӑ. «Эстрадное пение» номинацире 5-мӗш класс кадечӗсем ушкӑнпа юрласа III степеньлӗ лауреатсем пулса тӑнӑ. Юлия Щетинкина уйрӑм юрӑҫсем хушшинче виҫҫӗмӗш вырӑн ҫӗнсе илнӗ. Маттур ачасене саламлатпӑр, малашне те ӑнӑҫусем сунатпӑр.
Татьяна Варламова,
вӗрентекен.