Иртнĕ вырсарникун Канаш хулинче ветерансем хушшинче йĕлтĕрпе чупса мала тухассишĕн ăмăрту иртнĕ.
Асăннă ăмăртăва районти хастар спортсменсем те хутшăннă. Хырхĕрринче пурăнакан Николай Ятманов хăйĕн ÿсĕмĕнчисем хушшинче /66—70 çулхисем/ финиша чи малтан çитнĕ. Çак ÿсĕмрех хĕрарăмсем хушшинче Тамара Краснова палăрнă. Валерий Матвеев 56—60 çулхисенчен финиша пĕрремĕш çитнĕ. Иван Симендеев 31—36 çулхисем хушшинче виççĕмĕш вырăна тивĕçнĕ. Зуфар Тимаев, Вячеслав Лаврушкин, Алексей Самаркин, Федор Ефимов та ăмăртăва хутшăннă. Йĕлтĕр спортне кăмăллакансем республикăри ăмăртусенчен пĕрре те айккине юлмаççĕ. Палăртса хăвармалла, вĕсем унта хăйсен пуçарăвĕпе хутшăнаççĕ, ăсталăхне ÿстерес тесе ыттисемпе тупăшаççĕ.
— Ăмăртусенче çĕнтерме кунсерен йĕлтĕр çине тăрса чупни, сывлăха çирĕплетни пулăшать. Акă, çитес вăхăтра Улатăр, Çĕрпÿ районĕсенче ăмăртусем иртмелле. Унта та хутшăнасшăн эпир, — пĕлтерчĕ Николай Ятманов.
А.АНТОНОВА.