Ҫак кунсенче район центрӗнче Комсомольски райповӗн ҫӗнӗ йышши икӗ павильонӗ — «Хлебушко» тата «Точка вкуса» — уҫӑлчӗҫ. Ҫак саманта округ ҫыннисем тахҫанах кӗтнӗ тейӗн. Мӗншӗн тесен «Хлебозавод» ООО хатӗрлекен тутлӑ та пахалӑхлӑ продукцие, «Кооператор» ОООн сӗткенӗсене, «Комбинат питания» хатӗрлекен кукӑле, тортсене халӗ пӗр ҫӗртех туянма май пур. Ҫакӑ вара чӑннипех те меллӗ. Кун пирки савӑнӑҫлӑ мероприятие пухӑннӑ ҫынсем те пӗрре кӑна мар каларӗҫ.
«Пирӗн округри организацисем мӗн тери тутлӑ продукци хатӗрлеҫҫӗ. Хамӑра валли кӑна мар, кучченеҫ валли туянма та лайӑх», — терӗҫ вӗсем.
Павильонсене уҫнӑ мероприятие округ пуҫлӑхӗ Николай Раськин, райпо Канашӗн председателӗ Светлана Грачева, Чӑвашпотребсоюз правленийӗн председателӗн ҫумӗ Ирина Яшмолкина хутшӑнчӗҫ. Вӗсем продукци тутлӑ, ассортимент пуян пулнине палӑртрӗҫ. Малашне те пурнӑҫ уттинчен юлмасӑр аталанма сунчӗҫ.
Округ территорийӗнче ҫӗнӗ суту-илӳ точкисем хута кайни, ҫынсене пахалӑхлӑ продукци туянма майсем туса пани, паллах, ырӑ пулӑм.
Алевтина Антонова.