Кадетсен Комсомольски 2-мӗш вӑтам шкулӗ пуҫарнӑ Аслӑ Ҫӗнтерӗве халалланӑ округсем хушшинчи «Вальс Победы» балӗ кӑҫал 3-мӗш хут иртнӗ. Унта хамӑр округсӑр пуҫне Елчӗк, Ҫӗрпӳ округӗсенчи 14 ансамбль хутшӑннӑ. Комсомольскинчи «Кӗтне» физкультурӑпа спорт комплексӗнче вӗсем бал ташшисене ташлас ӑсталӑха кӑтартнӑ.
Кадет-вӗренекенсене Комсомольски округӗн депутатсен Пухӑвӗн председателӗ Светлана Грачева, Комсомольски 2-мӗш вӑтам шкулӗн директорӗ Евгений Савельев, «Кӗтне» ФСК директорӗн ӗҫӗсене пурнӑҫлаканӗ Валерий Денисов, Германире тата Варшава договорне кӗрекен ҫӗршывсенче службӑра пулнисен ветерансен совечӗн членӗсем тата ыттисем те саламланӑ.
Кадетӑн илемлӗ тумтирӗллӗ яшсем тата бал тумне тӑхӑннӑ хӗрсем илемлӗн вальс ҫеммипе ҫаврӑнчӗҫ. Ачасем халӑха Аслӑ Отечественнӑй вӑрҫӑра тӑшмана парӑнтарма мӗн тери йывӑр пулнине ташӑ чӗлхи урлӑ кӑтартса пама тӑрӑшнӑ.