Республикăра шашка вăййине вĕренӳ учрежденийĕсенче аталантарас, ачасене интереслентерес тĕлĕшпе ăмăртусем йĕркелени пысăк пĕлтерĕшлĕ. Кашни çулах шкулсенче «Тĕлĕнтермĕш шашкăсем» ятпа тупăшусем ирттересси йăлана кĕнĕ. Кăçал унта районти 16 команда хутшăнчĕ. Комсомольски 2-мĕш вăтам шкул команди хĕрӳ тупăшура 1-мĕш вырăн çĕнсе илчĕ. 2-мĕш вырăна Александровка тĕп шкул команди тивĕçрĕ. Хирти Явăш тĕп шкул команди 3-мĕш пулчĕ.
Канаш хулинче Патăрьел, Тăвай, Елчĕк районĕсен тата Канаш, Шупашкар хулисен командисем хушшинче Комсомольски 2-мĕш шкулта вĕренекенсем 1-мĕш вырăна алăран вĕçерт-мерĕç.
Турнирсен финал тапхăрĕнче Шупашкарта Йĕпреç тата Вăрмар районĕсен, Шупашкар тата Етĕрне хулисем тупăшнă. Комсомольски 2-мĕш шкулти 6-мĕш кадет класĕн вĕренекенĕсенчен — Кирилл Кузьминран, Риналь Бухаринран, Лев Вунберовран, Айгель Гиннетуллинаран тăракан команда 3-мĕш вырăна тивĕçрĕ.
Вĕсем асăннă фестивальте çитес çул та çак ушкăнпах хутшăнаяççĕ. Спортсменсене малашне тата та пысăкрах çитĕнӳсем тума сунатпăр.
Н.Максимов