Çак кунсенче Комсомольски 31-мĕш пушар хурал чаçĕн водительне Герман Крылова пысăк наградăпа — Чăваш Республикин Хисеп грамотипе чысланă. «Майсăр лару-тăру сиенĕсенчен асăрхаттарас тата вĕсене пĕтерес енĕпе тунă тава тивĕçлĕ ĕçсемшĕн» тесе палăртнă унта.
20 çул ытла пушар хурал чаçĕнче вăй хуракан Герман Николаевич çак чыса Канаш хулинче апрелĕн 1-мĕшĕнче пулнă пушара сÿнтерме хутшăннăшăн тивĕçнĕ. Ун чухне Разин урамĕнчи нумай хваттерлĕ çуртăн тăрри çуннă. Пысăк лаптăка ярса илнĕ «хĕрлĕ автана» лăплантарас ĕçе çывăхри районсен пушарнăйĕсем те хутшăннă.