Районти аграрисен халĕ çулталăкри чи хĕрÿ тапхăр пырать: вĕсем хĕрсех вырма ĕçĕсене пурнăçлаççĕ. Хирсенче пĕр самантлăха та техника шавĕ шăпланмасть.
Июлĕн 28-мĕшĕ тĕлне районти хуçалăхсем пурĕ 3026 гектар çинчи тырра пуçтарса кĕртнĕ, 5788 тонна «сарă ылтăн» çапса тĕшĕленĕ. Вăтам тухăç кашни гектартан 19,1 центнерпа танлашать. «Слава картофелю» агрофирмăра тата «Родина» ООО-ра кĕрхи тулла пĕтĕмпех пуçтарса кĕртнĕ.
Хуçалăхсем выльăх апачĕ хатĕрлес енĕпе те пикенсех ĕçлеççĕ. Хальлĕхе пурĕ 5384 тонна утă, 12475 тонна сенаж, 1441 тонна силос янтăланă. Пĕр çул ÿсекен курăксене — 427 гектар çинчен, нумай çул ÿсекен курăксене 3698 гектар çинчен çулнă.
Ĕçсем малалла пыраççĕ. Çанталăк уяр тăрсан хуçалăхсенче вăй хуракансем кашни ĕçе вăхăтра туса пĕтерме тăрăшаççĕ.
К.ГИМАЛЬДИНОВ.