Комсомольски 2-мĕш вăтам шкулĕнчи вулавăш республикăра иртнĕ «Чăваш Енри чи лайăх информаципе библиотека центрĕ — 2021» конкурсра çĕнтернĕ.
Çак конкурса информаципе библиотека центрĕсен концепцине аталантаракан мероприятисен планĕпе килĕшÿллĕн йĕркеленĕ. Конкурса тăратнă материалсем шкулта тăрăшакан библиотекарьсен вулав облаçĕнчи ĕçĕн чи лайăх практикипе паллаштарнă — темăсене суйласа илнинчен пуçласа хальхи мультимедиа технологийĕсемпе /видеороликсем, презентацисем/ усă курса ачасене кĕнеке вулас ĕçе явăçтарасси таранах.
Ĕçсене пĕтĕмлетнĕ чухне чи малтанах библиотека тата библиотекарь ĕçĕ-хĕлĕ çинчен ачасем, вĕрентекенсем мĕн пĕлнине, тĕрлĕ паха информацие сайтсем, хаçатсем, стена хаçачĕсем, стендсем урлă кăтартса панине шута илнĕ. Шкулти библиотека тĕрлĕ енлĕ ĕçленине тĕслĕхсемпе çирĕплетсе панă, вăл конкурсра 1-мĕш вырăна тивĕçнĕ. Вулавăшра ачасен кăмăлне тивĕçтерекен кĕнекесем чылай, Елена Савельева библиотекарь тăрăшнипе сахал мар мероприяти иртет.
Т.ДОЛГОВА,
вăтам шкул директорĕн çумĕ.