2001 çултан пуçласа кашни çулах майăн 22-мĕшĕнче Пĕтĕм тĕнчери Биологи тĕрлĕлĕхĕн кунне паллă тăваççĕ.
Пирĕн планета çинчи чĕрчунсемпе ÿсентăрансен тĕсĕсем чаксах пыраççĕ. Çакă чи малтанах çынсен ĕçĕ-хĕлĕпе çыхăннă. Çавăнпа та Рио-де-Жанейрăра 1992 çулта иртнĕ ООН Конференцийĕнче Биологи тĕрлĕлĕхĕ çинчен Конвенци йышăннă.
Биологи тĕрлĕлĕхĕн пĕтĕм тĕнчери кунĕн тĕллевĕ — Çĕр пичĕ çинчен чылай ÿсентăрансемпе чĕрчунсен тĕсĕсем çухални çине тимлĕх уйăрасси. Биологи тĕрлĕлĕхĕ чухăнланса пыни çине тĕрлĕ сăлтав витĕм кÿрет: çын çутçанталăкпа хăйне кирлĕ пек усă курни, тавралăха варалани, çĕрсем пушхирленсе пыни, климат ăшăнса пыни, çĕр çинчи çынсен шучĕ питĕ хăвăрт ÿссе пыни тата ытти те.