Округра пыракан строительство тата юсав ӗҫӗсем мӗнле пынипе влаҫ органӗсем интересленсех тӑраҫҫӗ. Час-часах обьектсенче пулса тухса тӑнӑ чӑрмавсене вырӑнтах татса пыма тӑрӑшаҫҫӗ.
Ҫак кунсенче округ пуҫлӑхӗ Николай Раськин тата район прокурорӗ Александр Данилов Ҫӗнӗ Мӑрат вӑтам шкулне ҫитсе унти лару-тӑрупа паллашнӑ. Кунта электромонтаж, водопровод ӗҫӗсем пыраҫҫӗ, урайне линолиум сараҫҫӗ, плиткӑсем хураҫҫӗ. Ӑшӑ памалли системӑна хута янӑ.
Комсомольски 2-мӗш вӑтам шкулӗнче вара эрнесеренех строительсемпе канашлу иртет. Строительсем ӗҫсене вӗҫлес тесе ҫине тӑрса вӑй хураҫҫӗ. Шалта та, тулта та ӗҫсем хӗрӳ пыраҫҫӗ. Кунта калаҫу тӗпрен илсен ӑшӑ парса тӑмалли система пирки пынӑ. Ӑна ӗҫе кӗртсе пыраҫҫӗ.
«Икӗ шкула та вӗренекенсем валли ҫӗнӗ сӗтел-пукан илсе килнӗ. Ку шкулсенче тата Комсомольскинчи «Колосок» ача садӗнчи юсав ӗҫӗ мӗнле пынине тӗрӗслесех тӑратӑп», — палӑртать Николай Никандрович.

