Аслӑ ӑрун «Кӗмӗл ӳсӗм» хутшӑну центрне ҫӳрекенсем кулленех ятарлӑ ҫар операцийӗнчи ентешсене пулӑшас тесе ырми-канми ӗҫлеҫҫӗ. Вӗсем маскировка сеткисем ҫыхаҫҫӗ, дронсенчен хӳтӗлекен утиялсемпе плащсем ҫӗлеҫҫӗ. Хӗрарӑмсем хатӗрленӗ япаласем салтаксене ҫапӑҫури йывӑр условисенче пысӑк пулӑшу кӳреҫҫӗ.
Ҫак кунсенче активистсем дронсенчен хӳтӗленме пулӑшакан 1000-мӗш утияла хатӗрленӗ. Кашни ҫакӑн пек япала хыҫӗнче ҫӗршер сехет ӗҫ, тӑрӑшуллӑ алӑсем, фронтри ентешсене пулӑшас туртӑм.
Хальхи ҫӑмӑл мар вӑхӑтра куратпӑр ӗнтӗ — ҫынсем чӑн-чӑн патриотлӑх кӑтартса ҫирӗп тыл пулма, ҫапӑҫусене кӗрекенсене май килнӗ таран пулӑшма тӑрӑшаҫҫӗ. Ҫак пархатарлӑ ӗҫе чун ыйтнипе хутшӑнакансем умӗнче пуҫ таятпӑр, вӗсем чи пысӑк тав сӑмахӗсене тивӗҫ.
Алевтина АНТОНОВА.