Апрелӗн 21—23-мӗшӗсенче Мускавра, «Россия» наци центрӗнче «Малая Родина — сила России» Пӗтӗм Раҫҫейри 2-мӗш форум пулса иртнӗ.
Унта ҫӗршыври пур регионсенчен те вырӑнти хӑйтытӑмлӑх пуҫлӑхӗсем, федераллӑ тата регионти влаҫ органӗсенче ӗҫлекенсем, бизнесра тӑрӑшакансем, обществӑлла организацисен тата экспорт обществин представителӗсем пуҫтарӑннӑ, вырӑнти самоуправлени ӗҫӗ-хӗлӗсене пӑхса тухнӑ, малашнехи тӗллевсене палӑртнӑ.
Форум ӗҫне пирӗн округ пуҫлӑхӗ Николай Раськин та хутшӑннӑ. Вӑл «ВКонтакте» сайтра унта пысӑк пӗлтерӗшлӗ ыйтусене пӑхса тухнине палӑртать. «Сильное село — процветающая Россия: новые возможности для развития» панельлӗ сессире ял территорийӗсен малашлӑхӗ пирки сӑмах пынине пӗлтерет.
Форумра вырӑнти муниципалитетсен ялти вырӑнӗ, агропромышленность комплексӗпе фермерсен аталанӑвӗ, ялти патшалӑх программисем, инфраструктурӑпа тирпей-илем, ҫамрӑксемпе кадрсем тата ытти ыйтусем тавра та сӑмах пынӑ.
(ХАМӐР ИНФ.).