ВДНХри «Раҫҫей» куравра чечексен фестивалӗ уҫӑлнӑ. Унта регионсем тематикӑлла экспозицисем: 89 клумба, 100 миллион ытла чечек, хӑйне евӗр флористика арт-объекчӗсем тӑратнӑ.
Куравра чӑвашсен «Пурнӑҫ йывӑҫҫипе» «Виҫӗ хӗвелӗ» те чечеке ларнӑ. Стенда хатӗрлекенсем пӗлтернӗ тӑрӑх, композицие республикӑн ялавне тӗпе хурса хатӗрленӗ. «Зеленстрой» АО ӑстисем ҫакна валли Шупашкарти предприятин питомникӗнче ӳстернӗ чечексемпе усӑ курнӑ.
Чӑваш Енӗн чечеклӗ экспозицине РФ Президенчӗн Администрацийӗн ертӳҫин пӗрремӗш ҫумӗ Сергей Кириенко тата РФ Президенчӗн Администрацийӗн ертӳҫин ҫумӗ Максим Орешкин та ҫитсе курнӑ.
Васкӑр, эсир те ҫак илеме курса юлма ӗлкӗретӗр.
(ХАМӐР ИНФ.).