Хӑтлӑлатмалли объектсене палӑртмалли онлайн сасӑлав апрелӗн 30-мӗшӗччен пырать. Кӑҫал сасӑлава республикӑри пилӗк хулари тата 20 муниципалитетри 55 объектпа дизайн-проект хутшӑнать.
Регионта пурӑнакан кашни ҫыннӑн тӑван тӑрӑхӗн аталанӑвне тӳпе хывма май пур. Хӑтлӑх кӗртмелли объектсемшӗн 14 ҫултан аслӑрах граждансем сасӑлама пултараҫҫӗ. Ку ӗҫе Патшалӑх пулӑшӑвӗсен порталӗнче авторизациленнӗ хыҫҫӑн 21.gorodsreda.ru страницӑра, муниципалитетсен тата влаҫ органӗсен сайтӗнчи общество сасӑлавӗн «Патшалӑх пулӑшӑвӗсен порталӗ. Пӗрле татса паратпӑр» уйрӑмӗнче пурнӑҫлама пулать. Ҫавӑн пекех волонтерсен приложенийӗсенче сасӑлама май пур. 1600 ытла волонтер сасӑлава хутшӑнакан муниципалитетсенчи халӑх йышлӑ ҫӳрекен вырӑнсене тухса хӑтлӑлатмалли объектсем пирки каласа кӑтартаҫҫӗ, ҫынсене сасӑлаттараҫҫӗ.
Сасӑлавра ҫӗнтернӗ объектсене 2025 ҫулта «Ҫурт-йӗр тата хула хутлӑхӗ» наци проекчӗн «Хӑтлӑ хула хутлӑхне йӗркелесси» федераци проекчӗпе килӗшӳллӗн йӗркене кӗртӗҫ. Палӑртса хӑвармалла: «Ҫурт-йӗр тата хула хутлӑхӗ» наци проекчӗ Раҫҫей Президенчӗн Владимир Путинӑн пуҫарӑвӗпе пурнӑҫланать. Ку таранччен патшалӑх пулӑшӑвӗпе Чӑваш Енри 200 ытла вырӑнта хӑтлӑх кӗртнӗ.
Пирӗн округра пурӑнакансем Канашская урама хӑтлӑх кӗртессишӗн тата универсаллӑ спорт площадки тӑвассишӗн сасӑлама пултараҫҫӗ.