Мартӑн 16-мӗшӗнче Комсомольскинчи Этнобиблиотекӑри ҫул ҫитмен ачасен (ТОП) хутшӑнӑвӗн территорийӗнче Малтисен юхӑмӗн хастарӗсем туслӑ тӗлпулӑва хутшӑннӑ.
Ачасем Сочире иртнӗ Пӗтӗм тӗнчери ҫамрӑксен фестивальне хутшӑннӑ Анастасия Галзановӑпа тӗл пулнӑ. Анастасия Комсомольски 2-мӗш вӑтам шкулӗнчен вӗренсе тухнӑ, халь вӑл И.Н.Ульянов ячӗллӗ ЧПУ студенчӗ.
Настя хӑй малтан конкурса хутшӑнни, унӑн пӗтӗмлетӗвӗсемпе фестивале кайма тивӗҫни ҫинчен каласа панӑ. Фестивалӗн асра юлнӑ ҫутӑ саманчӗсем, ҫак форумра ҫӗнӗ туссем тупни пирки те тӗплӗн чарӑнса тӑнӑ. «Ир-ирех зарядкӑна, йогӑна кайма, пӗр-пӗр творчествӑлла ӗҫ тума, сцена ӑсталӑхӗнче, вокалта хамӑра тӗрӗслеме май пулчӗ, каҫхине те тӗрлӗ мероприяти ирттерчӗҫ. Фестивалӗн «Душа России» лапамӗнче кашни каҫ наци тумӗллӗ пин-пин ҫамрӑк пӗр-пӗрне хӑйсен халӑхӗсен ташшисене вӗрентрӗ, юрӑсем юрларӗ. Ют ҫӗршыв ҫамрӑкӗсем уйрӑмах «Катюшӑна» кӑмӑлларӗҫ», — аса илчӗ Настя ҫав кунсене. Вӑл ачасене «Эпир — ҫӗршывӑн пуласлӑхӗ, пирӗн Тӑван ҫӗршыв мӗнле пурӑнасси, аталанасси хамӑртан килет» текен пӗлтерӗшлӗ те актуаллӑ сӑмаха аса илтернӗ. «Нихӑҫан та хӑ-вӑрӑн тӗллевсенчен ан чакӑр, ӗмӗтӗрсем патне хӑюллӑн утӑр, пӗр-пӗр ӗҫ тӳрех ӑнмасан та парӑнма ан шутлӑр», — канаш панӑ вӑл ҫамрӑксене. Аслӑ классенче вӗренекенсем Анастасийӑна кӑсӑклансах итленӗ, ыйтусем панӑ. Ачасем маттур пикене Малтисен юхӑмӗн хастарӗсенчен асӑнмалӑх хӑйсем тунӑ япаласене парнеленӗ.
Тӗлпулӑва хутшӑннисене муниципаллӑ округ администрацийӗн вӗрентӳ пайӗн начальникӗ Наталия Комиссарова саламланӑ, пуҫарусенче ӑнӑҫу суннӑ, Анастасийӑна пурнӑҫри хастар позицишӗн тав тунӑ.
(ХАМӐР ИНФ.).