Раҫҫей Президенчӗ В.Путин кӑҫалхи ҫула Ҫемье ҫулталӑкӗ, Чӑваш Республикин Пуҫлӑхӗ О.Николаев Экологи тата ҫутҫанталӑкпа перекетлӗ усӑ курассин ҫулталӑкӗ тесе палӑртнӑ.
Мартӑн 7-мӗшӗнче Комсомольскинчи культура ҫуртӗнче ҫав ҫулталӑксене савӑнӑҫлӑ лару-тӑрура уҫнӑ. Вӑл мероприяти мартӑн 8-мӗшӗнчи уяв умӗн пулнипе Пӗтӗм тӗнчери Хӗрарӑмсен кунне те халалланӑ.
Фойере вырӑнти ӑстасен алӗҫӗсен выставкине йӗркеленӗ. Кунтах ҫӳҫрен ҫивӗт явас, йывӑҫ касӑкӗ ҫине пӑта ҫапса кӗртес тата ытти конкурссем те пулнӑ. Вӗсем пурте ҫемьери кулленхи пурнӑҫпа ҫыхӑннӑ. Н.Абдюшева аквагрим енӗпе мастер-класс йӗркеленӗ.
Залра пуҫтарӑннисене округ пуҫлӑхӗ Н.Н.Раськин саламланӑ. Ҫемье кашни ҫыншӑн пысӑк пӗлтерӗшлӗ вырӑн йышӑннине палӑртнӑ. Хамӑр пурӑнакан вырӑнти ҫутҫанталӑка упрасси те чи кирлӗ ыйту пулни ҫинче чарӑнса тӑнӑ. Вӑл округра пурӑнакан хӗрарӑмсене уяв ячӗпе саламланӑ. Депутатсен Пухӑвӗн председателӗн С.Н.Грачевӑн сӑмахӗсенче те ҫав шухӑшсемех палӑрнӑ. Вӑл та салам сӑмахӗсемпе пӗрлех Ҫемье, Экологипе ҫутҫанталӑкпа перекетлӗ усӑ курассин ҫулталӑкӗсем кашни ҫынна ҫӗнӗ утӑмсем тума, шухӑшлавӗ ҫине витӗм кӳме хистемеллине пӗлтернӗ.
Малалла сцена ҫине юрра-ташша юратакан вырӑнти артистсем тухнӑ. Куракансем Альбинӑпа Виктор Кокшинсен, Иринӑпа Радий Басниковсен, Азат Фасхутдиновӑн, Петровсен пысӑк ҫемйин ансамблӗн, пӗртӑван Оксана Козинӑпа Татьяна Миговорован, Комсомольскинчи искусствӑсен шкулӗнчи «Островок» хореографи, «Вербочка» вокал ансамблӗсен тата ытти юрӑҫсемпе коллективсен пултарулӑхне хапӑлласа йышӑннӑ.
Савӑнӑҫлӑ мероприятире Ҫемье ҫулталӑкне халалланӑ «В объективе — семья» конкурс ҫӗнтерӳҫисене «Мамина радость» тата «Папина гордость» номинацисемпе чысланӑ.
Н.Раськин округ (район) аталанӑвӗшӗн пысӑк тӳпе хывнӑшӑн пултаруллӑ хӗрарӑмсене О.В.Александровӑна, В.М.Акчуринӑна, Г.Х.Гайняловӑна, Р.Н.Горбуновӑна, З.Н.Григорьевӑна, М.А.Ивановӑна, Г.Н.Мельниковӑна, Г.П.Петровӑна, М.И.Самаринӑна, Т.М.Тихоновӑна район 85 ҫул тултарнӑ ятпа кӑларнӑ юбилей медалӗсем парса чысланӑ.
Раҫҫейри Ҫемье, Чӑваш Республикинчи Экологи тата ҫутҫанталӑкпа перекетлӗ усӑ курассин ҫулталӑкӗсене халалланӑ мероприятисем малашне татах та нумай пулӗҫ. Вӗсем округра пурӑнакансене тӗрлӗ енлӗ пархатарлӑ ӗҫсем тума хавхалантармалла. Ҫулталӑксенче пурнӑҫлама палӑртнӑ тӗллевсем пӗр кӑҫалхи ҫулшӑн ҫеҫ мар, малашлӑхшӑн та пулӗҫ.
Юрий Гаврилов.