Февралӗн 12-мӗшӗнче Хирти Мӑнтӑр вӑтам шкулӗнче «Тӑван чӗлхепе тата тӑван литературӑпа чи лайӑх вӗрентекен» конкурсӑн муниципаллӑ тапхӑрӗ иртрӗ.
Ку конкурса Комсомольски 1-мӗш, Тукай Мишер тата Асанкасси вӑтам шкулӗсенчи А.Н.Артемьева, Ч.Н.Багаутдинова, О.Н.Копташкина хутшӑнма кӑмӑл турӗҫ. Конкурсантсем ачасемпе уҫӑ уроксем, класс сехечӗсем ирттерчӗҫ, хӑйсен ӗҫ-хӗлӗнче усӑ куракан мелсемпе, меслетсемпе паллаштарчӗҫ, мастер-классем кӑтартрӗҫ.
Конкурсӑн кашни тапхӑрӗнчех вӗрентекенсен пултарулӑхӗ, ӑсталӑхӗ ҫӳллӗ шайра пулни палӑрчӗ. Вӗсен ӗҫне сумлӑ тӳресем тимлерӗҫ. Конкурсантсем пӗр-пӗрин опычӗпе паллашрӗҫ, тӗрлӗ методика ҫӗнӗлӗхӗсене тишкерчӗҫ, тӑван чӗлхепе литературӑна вӗрентес ӗҫри ҫивӗч ыйтусене сӳтсе яврӗҫ. Маттур педагогсем ачасемпе пӗр чӗлхе тупма пултарчӗҫ, кашни урокрах ӑшӑ кӑмӑл-туйӑм хуҫаланчӗ.
Тӳресем пӗр шухӑшлӑ пулса ҫӗнтерӳҫӗ ятне Оксана Николаевна Копташкинӑна пачӗҫ. Эпир ӑна округ чысне республикӑра хӳтӗлеме ӑнӑҫу сунатпӑр.
Лариса ДАНИЛОВА.