Сентябрӗн 3-мӗшӗнче Аслӑ Чурачӑкри Преобрежение Господня чиркӗвне Шупашкар тата Чӑваш Ен митрополичӗ, Чӑваш митрополийӗн пуҫлӑхӗ Савватий ҫитсе курнӑ.
Ӑна муниципаллӑ округӑн пуҫлӑхӗн ӗҫӗсене тӑвакан Н.Н.Раськин, вырӑнти чиркӳ настоятелӗ Георгий атте, священнослужительсем, Турра ӗненекенсем, ачасем ҫӑкӑрпа, чечек ҫыххипе чыслӑн кӗтсе илнӗ. Хаклӑ хӑна килнӗ тӗле прихут ҫыннисем чиркӳре тата ун таврашӗнче тирпей-илем пултӑр тесе чылай тӑрӑшнӑ.
Митрополит кунти чиркӳре литурги ирттернӗ. Унта Канаш тата Беловолжск епископӗ Стефан, Луцкинчи Хусан Турӑ амӑшӗн иконӗн храмӗн настоятелӗ Сергей Скворцов, Канаш епархийӗн иерейӗ Сергей Карсаканов тата ытти тӗн ҫыннисемпе Турра ӗненекенсем хутшӑннӑ. Савватий митрополит чиркӳ ӗҫне хастар хутшӑнакансене наградӑсем панӑ.
(ХАМӐН ИНФ.).