Масар — сӑваплӑ вырӑн. Унти тасалӑхпа тирпейлӗхшӗн кашни тӑрӑшни кирлӗ. Акӑ, ҫак кунсенче Комсомольски ял масарӗ ҫине каякан ҫула юсас ӗҫсем пуҫланнӑ. Вӑл ванса, ҫӗмӗрӗлсе пӗтнӗччӗ. Ӑна пуҫаруллӑ бюджет укҫи-тенкине патшалӑх пулӑшӑвӗ ҫумне явӑҫтарнипе пурнӑҫлаҫҫӗ. Кунта ӗҫсем хӗрӳ пыраҫҫӗ.
Ку масара Комсомольски, Кӗҫӗн Каҫал, Ҫӗнӗ Шӑхран ялӗсенче вилнисене тирпейлесе пытарнӑ.
Кӗҫех православи тӗнне ӗненекенсен пысӑк уявӗ, Ҫимӗк, ҫитет. Пӗтӗм халӑх ваттисене асӑнма масарсене ҫул тытать. Строительсем уяв ҫитиччен ҫул-йӗре йӗркене кӗртсе пӗтересшӗн.