Муниципаллӑ округри культура ӗҫченӗсем 2022 ҫулхи ӗҫ-хӗле пӗтӗмлетнӗ. Малтанах канашлӑва хутшӑнакансем культура ҫурчӗн фойинче вырнаҫтарнӑ ал ӗҫ выставкипе паллашнӑ.
Округра пурӑнакансен культурӑллӑ канӑвне мӗнле йӗркелени, ҫитӗнӳсем, малашнехи тӗллевсем пирки культура секторӗн ертсе пыракан специалист-эксперчӗ М.А.Кокорева доклад тунӑ. «Централизациленӗ клуб системи» АУн организаципе методика службин заведующийӗ В.Н.Курицына хӑйӗн сӑмахӗнче пӗлтӗр халӑхпа йӗркеленӗ мероприятисем ҫинче тӗплӗн чарӑнса тӑнӑ. «Централизациленӗ библиотека системи» МБУК директорӗ И.П.Ядрова ялсенчи библиотекӑсен ӗҫӗ-хӗлӗпе паллаштарнӑ.
Комсомольски муниципаллӑ округ пуҫлӑхӗ А.Н.Осипов культура ӗҫченӗсем иртнӗ ҫул япӑх мар ӗҫлесе пынине палӑртнӑ, районӑн обществӑлла пурнӑҫне хастар хутшӑннӑшӑн тав тунӑ, малашнехи тӗллевсемпе паллаштарнӑ.
ЧР культура, национальноҫсен ӗҫӗсен тата архив ӗҫӗн министрӗн ҫумӗ Г.Л.Богуславский республикӑри культура пурнӑҫӗнче Комсомольски муниципаллӑ округӗнче пурӑнакансем паллӑ вырӑн йышӑнни ҫинчен каланӑ. Ку тӑрӑхра пултаруллӑ ҫынсем пурӑннине, вӗсем малашне те тӗрлӗ мероприятисенче палӑрасса шаннине пӗлтернӗ.
Нумай ҫул культура ӗҫӗнче тӑрӑшса ҫитӗнӳсем тунӑшӑн тӗп культура ҫурчӗ ҫумӗнчи халӑх театрӗн режиссерне М.П.Шумилкинӑна ЧР культура, национальноҫсен тата архив ӗҫӗсен министерствин Хисеп грамотипе наградӑланӑ. Округри тӗп библиотека ӗҫченне В.Г.Боровковӑна муниципаллӑ округӑн Хисеп грамотипе, Александровка ял вулавӑшӗн библиотекарьне В.Н.Потаповӑна министерствӑн Тав ҫырӑвӗпе чысланӑ.
Канашлу ӗҫне министерствӑн, халӑх творчествин республикӑри ҫурчӗн, Наци библиотекин, Наци музейӗн, Чӑваш культурипе искусствин институчӗн, округри территори уйрӑмӗсен начальникӗсем, муниципаллӑ культура учрежденийӗсенче тӑрӑшакансем хутшӑннӑ.
Г.Юрьев.