Нумаях пулмасть Кĕçĕн Çĕрпÿелĕнчи спортзалта Василий Петрович Разумов вице-адмирала асăнса пневматика винтовкинчен тĕл перессипе ăмăрту иртрĕ. Василий Петрович Аслă Çĕрпÿелĕнче 1909 çулхи апрелĕн 30-мĕшĕнче çуралнă. Вăл флотра карапсем тăвакан инженер пулнă. Нумай çул Тинĕс-çар флотĕнче службăра тăнă ентеш чылай наградăсене тивĕçнĕ. Унăн мухтавлă ятне эпир асра тытатпăр.
Унта шкулта вĕренекенсем, Тинĕс-çар флотĕнче салтак тивĕçне пурнăçланисем тата ял-йыш хутшăнчĕç. Ăмăрту умĕн районти Тинĕс-çар флочĕн ветеранĕсен союзĕн председателĕ Евгений Орешкин, районти депутатсен Пухăвĕн депутачĕ Александр Тихонов, ял поселенийĕн пуçлăхĕ Александр Орешкин, Сергей Соколов тухса калаçрĕç. Спортра ăнăçу, çирĕп сывлăх, телей сунчĕç. 5-мĕш класс вĕренекенĕсем Кирилл Шурбин 1-мĕш, Алеся Орешкина 2-мĕш, Эвелина Гамидова 3-мĕш вырăнсене тивĕçрĕç. Аслисем хушшинчи ăмăртура ял тăрăхĕн пуçлăхĕ Александр Орешкин пĕрремĕш вырăна йышăнчĕ, Александр Кольцов — иккĕмĕш, Сергей Соколов — виççĕмĕш. Владимир Васильевич Романов /72 çулта/ перекенсенчен чи ватти пулчĕ. Пирĕн ентеше сума сунăшăн, уяв ирттерме пулăшнăшăн спонсорсене пурне те тав тăватпăр, спортра та, ĕçре те çитĕнÿсем тума çирĕп сывлăх, ăнăçу, пурнăçра телей сунатпăр.
Е. ОРЕШКИН.