Владимир Маков васкавлă пулăшу машини çинче водительте ĕçлеме пикеннĕренпе кĕçех 35 çул çитет. Çак хушăра паци-ентсемпе пулса иртекен лару-тăрусене чĕре çывăхне илмелле маррине, унсăрăн ăса çухатма та пулнине лайăх ăнланнă вăл. «Эпĕ хамăн ĕçе çеç тăватăп, пациента машинăна вырнаçтарма пулăшатăп, лару-тăру йывăр чухне пысăк хăвăртлăхпа пыратăп. Çынсене кирлĕ ĕç туни савăнтарать», — тет водитель.
Пĕлтĕр Владимир Валентинович Патăрьелĕнчи подстанцин бригадинче регионсем хушшинчи професси ăсталăхĕн конкурсне хутшăннă. Унта çул-йĕр çинчи правилăсене пĕлес енĕпе 3-мĕш вырăна тухма пултарнă. Пултаруллă водитель çамрăк специалистсене яланах ĕçпе те, канашпа та пулăшма хатĕр. Çавăнпа та ăна коллективра пурте хисеплеççĕ.