Районти ача-пăча библиотекинче Раççейри Театр çулталăкне тата район 80 çул тултарнине халалласа театрализациленĕ мини-постановкăсен районти конкурсне ирттернĕ. Конкурса хутшăнакансем икĕ номинацире: «Юбиляр-çыравçăсен хайлавĕсем тăрăх — инсценировка» тата «Комсомольски районĕн çыравçисен хайлавĕсем тăрăх — инсценировка» хăйсен пултарулăхне кăтартнă. Мероприятие ачасене вулава ытларах явăçтарас тĕллевпе йĕркеленĕ.
Конкурса хутшăнакансен пултарулăхне икĕ ÿсĕмре хак панă: шкул çулне çитменнисем тата 7—10 çулти ачасем. Жюри членĕсене чи лайăххисене палăртма çăмăл пулман. Нумай шутланă хыççăн «Юбиляр-çыравçăсен хайлавĕсем тăрăх — инсценировка» номинацире шкул çулне çитменнисем хушшинче «Колосок» ача сачĕ /ертÿçисем — Н.П.Долгова, А.З.Кислякова, Т.Р.Каримуллина/ çĕнтернине палăртнă. 2-мĕш вырăнта — «Рябинушка» ача сачĕн «Теремок» ушкăнĕ /ертÿçисем — С.В.Козлова, М.А. Волкова/, 3-мĕш вырăнта — «Рябинушка» ача сачĕн «Ромашка» ушкăнĕ /ертÿçи — Л.А.Оленева/.
«Комсомольски районĕн çыравçисен хайлавĕсем тăрăх — инсценировка» номинацире «Радуга» ача сачĕ Н.Ытарайăн «Çăмха» хайлавĕ тăрăх лартнă постановкипе мала тухнă /ертÿçи — О.П.Григорьева/.
7—10 çулти вĕренекенсем хушшинче 1-мĕш вырăна Комсомольски 1-мĕш вăтам шкулĕн 2-мĕш класс ачисем тухнă /ертÿçи — А.А.Валитова/. 2-мĕш вырăнта — Комсомольски 2-мĕш вăтам шкулĕн 2-мĕш класс ачисем /ертÿçи — М.В.Кондратьева/, 3-мĕш вырăнта — Комсомольски 2-мĕш вăтам шкулĕнче 3-мĕш класра вĕренекенсем /ертÿçи — З.П.Краснова/ тата çак шкултах 2-мĕш класра вĕренекенсем /ертÿçи — Г.В.Волкова/.
«Колосок» ача садне çÿрекен А.Трофимов «Чи лайăх костюмшăн» Хисеп грамотине тивĕçнĕ. «Радуга» ача садне çÿрекен М.Андреева тата Комсомольски 1-мĕш вăтам шкулĕн 2-мĕш класĕнче вĕренекен Д.Матросовăна «Чи лайăх рольшĕн» Хисеп грамотисем панă.
Мероприятире ачасем республикăри театрсем, театрпа çыхăннă профессисем, театрта хăйсене мĕнле тытмалли çинчен чылай çĕннине пĕлнĕ. Çĕнтерÿçĕсем Дипломсемпе парнесене тивĕçнĕ.
Е.ПРОКОПЬЕВА,
библиотекарь.