Четверг, 22 февраля

Кутузов наводчикăн паттăрлăхĕ

Кутузов наводчикăн паттăрлăхĕ

Алексей Герасимович Кутузов Хирти Выçли ялĕнче 1907 çулта çуралнă. Кунтах вĕреннĕ, кунтах ĕçе хăнăхнă. Вăрçă пирки тĕлленмен ĕнтĕ вăл.
Хаяр вăрçă пуçлансан арçынсен алла хĕç-пăшал тытма тивнĕ. Алексей вăрçа малтанхи кунсенчех лекнĕ. 1941 çулхи çурла уйăхĕнче вырмана тухас вырăнне танксене хирĕç тăракан 1070 артиллери полкĕнче наводчик пулса тăнă /Воронеж фрончĕн 27-мĕш çарĕ/.
Кĕçĕн сержант ятне илнĕскер вăрçă ĕçне тĕплĕ тунипе палăрать. Чăвашра çиччĕ виç те пĕрре кас тенине асра тытнă вăл. Наводчик тĕрĕс те тĕплĕ ĕçленине кура çар малалла куçма пултарнă, пехота упраннă.
Новая Березовка ялĕнчен /Смоленск облаçĕ/ тăшмана хăваласа кăларнă чух 1943 çулхи çурлан 4-мĕшĕнче ентеш паттăрлăх кăтартать. Тĕрĕс наводка парса тăшмансен хĕç-пăшалпа çунтармалли-сĕрмелли материал тиенĕ 8 автомашинине умлă-хыçлă сирпĕтет. Тăшман пушă алăпа тăрса юлать. Тепĕр 3 кунран яла тăшмансенчен ирĕке кăлараççĕ. Алексей Кутузова хăюлăхшăн «За Отвагу» медаль парса чыслаççĕ.
Çав çулхи раштав уйăхĕнче Торчин ятлă ял патĕнче /Украина/ Кутузов наводчик тĕрĕс тĕл кăтартнипе /тăшмансем чарăнмасăр пенĕ хушăра, хăйсене лекесрен сыхланнă май/ нимĕçсен 5 танкне тата вĕсен экипажĕсене тĕп тунă. Ĕненсемĕр, питĕ йывăр та хăрушă пулнă вăл самантсем. Наводчик полк куçĕ пекех. Эпир халь çил-тăманра куçа уçса пыма кансĕр тетпĕр. Кунта вара раштаври çил- тăмансăр пуçне хура тĕтĕм явăннă, тусан вĕçнĕ, йĕри- тавра сирпĕннĕ. Паттăр пулнишĕн ку çапăçу хыççăн ен- теше 2-мĕш степеньлĕ орден параççĕ.
1944 çулта çуркунне Витебск хули патĕнче ентеш йывăр аманать. Снаряд ванчăкĕ ун урине хытах касса кĕрет, вăй питти çынна инвалид туса хурать. Виçĕ уйăх госпитальте сипленсен Алексей Кутузов яла таврăнать, анчах амантăм тесе ачашланмасть, колхоз ĕçне хутшăнать, вăй çитнĕ таран ыттисенчен юлмасăр Тăван çĕршывшăн тăрăшать.
Епле мăнаçланмăн çавăн пек ентешсемпе?! Темле хурçăран шăратнăн туйăнаççĕ унашкал çынсем. Вĕсене вут та, шыв та илеймест тейĕн. Шăпах вĕсем харсăр пулнипе пирĕн çар тăшмана çĕнейнĕ. Халăх хастар пулнипе вăрçă хыççăн çĕнĕрен ял-хула çĕкленĕ. Тайма пуç вĕсене.
В.ФИЛИППОВА.

 

Добавить комментарий

Ваш адрес email не будет опубликован. Обязательные поля помечены *