Çуллахи вăхăтра уçă е çăмăллăнах уçăлакан чÿречесем ачасемшĕн хăрушлăх кăларса тăратаççĕ. Ачасем хăйсемех чÿрече янахĕ çине хăпарса кайса москит сетки çине тайăнса чÿречерен тухса ÿкнĕ тĕслĕхсем чылай. Аслисем сăнаса çитерейменни, сĕтел-пукана чÿрече çывăхне вырнаçтарни, чÿрече çинче ятарлă питĕрекен хатĕр çукки инкек патне илсе çитереççĕ.
Кăçал ачасем çÿллĕ вырăнтан ÿкнĕ 19 тĕслĕхе палăртнă. Телее, вĕсем пурте сывă юлнă. Тĕслĕхрен, июлĕн 11-мĕшĕнче Етĕрне районĕнче çулталăкри хĕрача чÿречен москит сетки çине тайăнса иккĕмĕш хутран тухса ÿкнĕ. Йĕпреç районĕнче вара пĕрремĕш хутран 7-ри арçын ача ÿкнĕ. Вĕсене тивĕçлĕ медицина пулăшăвĕ панă.
РФ СК Чăваш Республикинчи следстви управленийĕ пурне те пÿлĕмсене уçăлтарнă чухне асăрхануллă пулмаллине, ачасене сăнасах тăмаллине, сĕтел-пукана уçă чÿречесем çывăхне лартмалла маррине аса илтерет. Чÿречесем çине ятарлă питĕрекен хатĕрсем лартсан аван. Тимлĕ пулăр, ачасем инкеке ан лекчĕр.
А.ИВАНОВ.