Нумаях пулмасть Комсомольскинчи этнобиблиотекӑра перекет тата инвестици енӗпе Пӗтӗм Раҫҫейри 2-мӗш ҫемье фестивалӗн муниципалитетри тапхӑрӗ иртнӗ. Ӑна халӑх хушшинче финанс пӗлӗвне сарас тата финанс культурине ӳстерме пулӑшас тӗллевпе йӗркеленӗ.
Фестивале Анисимовсен, Ульдинсен, Козловсен, Мидюковсен, Столяровсен командисем хутшӑннӑ. Вӗсен тӗрлӗ ыйтусен хуравӗсене шырама тивнӗ.
Пуҫтарӑннисене округ пуҫлӑхӗ Николай Раськин, район администрацийӗн вӗрентӳ па-йӗн начальникӗ Наталия Комиссарова, финанс пайӗн начальникӗ Зульфия Айнетдинова, Хӗрарӑмсен союзӗн округри уйрӑмӗн председателӗ Инна Ядрова саламланӑ, фестивальте тупӑшакансене ӑнӑҫу суннӑ.
Ҫемьесен «Страхование сбережений — забота о будущем» квизра, «Инвестируй в будущее» интерактивлӑ калькуляторта, «Осторожно: лжеброкер!» чек-листра пӗлӗвӗсене кӑтартма тивнӗ. Ыйтусем страхлассин пӗлтерӗшӗ, укҫа-тенке инвестицие хывасси, ултавҫӑсенчен пурлӑха сыхласси тата ытти енсемпе те пулнӑ. Кашниех конкурссене хастар хутшӑннӑ, вӗсен хуравӗсем тулли пулнӑ.
Ҫӗнтерӳҫӗ ята Ульдинсен туслӑ ҫемйи ҫӗнсе илнӗ. Вӗсен июнӗн 21-мӗшӗнче Канашри финанспа экономика колледжӗнче иртекен фестивалӗн регионти тапхӑрӗнче хӑйсен пӗлӗвне кӑтартмалла пулать. Анисимовсен килӗшӳллӗ ҫемйи — 2-мӗш, Мидюковсен ҫемйи 3-мӗш вырӑнсем йышӑннӑ.
Ҫӗнтерӳҫӗсене саламлатпӑр, пурнӑҫра ӑнӑҫу сунатпӑр.
Валентина Боровкова.