Нумаях пулмасть пирӗн округра «Чӑваш апачӗ» гастрономи фестивальне йӗркелекенсем хӑнара пулнӑ. Фестивале чӑваш апачӗсен тӗрлӗ енлӗхне, халӑх йӑлисене кӑтартса парас, ҫавӑн пекех республикӑра шалти туризма аталантарас тӗллевпе ирттереҫҫӗ.
Хӑнасем чи малтанах Тукайри Ҫветтуй Архангел Михаил чиркӗвне ҫитсе курнӑ. Унта вӗсене округ пуҫлӑхӗ Николай Раськин тата Тукай территори уйрӑмӗн начальникӗ Светлана Кондратьева кӗтсе илнӗ. Малалла вӗсем Комсомольскине ҫул тытнӑ. «Развилка» кафери шеф-повар Антон Решетников вырӑнти партнерсен продукцийӗнчен хатӗрленӗ апат-ҫимӗҫпе паллаштарнӑ.
Хӑнасем «Слава картофелю» агрофирмӑна та ҫитсе курнӑ. Директорӑн производство енӗпе ӗҫлекен ҫумӗ Юрий Емельянов вӗсене аграри секторӗнчи малта пыракан технологисене кӑтартса панӑ.
Фестивалӗн пӗтӗмлетӗвӗсем тӑрӑх республикӑри чи лайӑх обществӑлла апатлану вырӑнӗсене тата чи пултаруллӑ шеф-поварсене палӑртӗҫ.