Мартӑн 27-мӗшӗнче пӗтӗм тӗнчере Театр кунне уявлаҫҫӗ. Театр — мӗн авалтан пыракан искусство. Апла пулин те, вӑл халь те хӑйӗн пӗлтерӗшне ҫухатман. Спектакльсем пӑхнӑ чухне чылайӑшӗ сцена ҫине тухма ӗмӗтленет пулӗ. Халӑх театрӗсене хутшӑнни ялсенче пурӑнакансене те артист пек пулса курма, куракансене хӑйсен пултарулӑхӗпе савӑнтарма май парать.
Ҫак кунсенче Комсомольскинчи культура ҫуртӗнче Пӗтӗм тӗнчери театр кунне халалласа «Театральная рампа» конкурс-фестиваль ирттернӗ. Унта ялсенчи культура ҫурчӗсен тата вӗренӳ учрежденийӗсен театр коллективӗсем хутшӑнса хӑйсен пултарулӑхне кӑтартнӑ.
Чи малтанах сцена ҫине В.Х.Зайцева ячӗллӗ халӑх театрӗн ҫамрӑксен «Спутник» театр студийӗн хастарӗсем тухнӑ. Вӗсем «Репка» сценка лартса куракансене хаваслантарнӑ. Комсомольски 1-мӗш вӑтам шкулӗн «Овация» коллективӗ «Ералаш» кӑтартнине куракансем хапӑлласах йышӑннӑ. Йӑлмахва, Асанкасси, Кивӗ Сӗнтӗр, Дубовка, Анат Тимӗрчкасси культура ҫурчӗсен хастарӗсем тӗрлӗ сценкӑсем кӑтартса курма пынисене култарнӑ та, куҫҫульлентернӗ те. Театр тӗнчине юратакансем вӗсене алӑ ҫупса хавхалантарнӑ.
Мероприятие пӗтӗмлетсе жюри членӗсем чи маттуррисене палӑртнӑ. Пӗрремӗш вырӑна «Корреспондент» сценка лартса Дубовка культура ҫурчӗн артисчӗсем тивӗҫнӗ. Иккӗмӗш вырӑнта — В.Х.Зайцева ячӗллӗ халӑх театрӗ. Вӗсем куракансене Анатолий Чебановӑн «Праски инке хӗр парать» комедин пӗр пайне кӑтартса савӑнтарнӑ. Виҫҫӗмӗш вырӑнта — Асанкасси артисчӗсем.
Ҫӗнтерӳҫӗсем тата тӗрлӗ енлӗн палӑрнӑ коллективсем парнесемпе Хисеп грамотисене тивӗҫнӗ. Ҫакӑн пек кӑмӑллӑ, хаваслӑ кану каҫӗ йӗркелесе ирттерессишӗн тӑрӑшнӑ М.Волковӑна тата культура ӗҫченӗсене куракансем ӑшшӑн тав тунӑ.
(ХАМӐР ИНФ.).