Районти ял хуҫалӑх предприятийӗсенче тырпултан пушаннӑ лаптӑксем кунран-кун хушӑнсах пыраҫҫӗ. Уяр кунпа усӑ курса «хир карапӗсем» иртен пуҫласа каҫченех хирте ӗҫлеҫҫӗ. Шел пулин те ӑмӑр тата ҫумӑрлӑ ҫанталӑк ӗҫсене вӑхӑтра пурнӑҫлама чарса тӑрать.
Сентябрӗн 16-мӗшӗ тӗлне округӗпе 8752 гектар пӗрчӗллӗ тата пӑрҫа йышши тырӑсене пуҫтарса кӗртнӗ. Ку пурнӑҫламалли ӗҫ планӗнчен — 70,8 процент. Йӗтемсем ҫине пурӗ 26740 тонна тырӑ кӗнӗ. Вӑтам тухӑҫ хальлӗхе кашни гектар пуҫне — 30,5 центнер.
Ҫавӑн пекех хуҫалӑхсенче ҫӗрулми кӑлараҫҫӗ. Хальлӗхе ҫак ӗҫе 172 гектар ҫинче пурнӑҫланӑ, 6130 тонна пуҫтарса кӗртнӗ. Вӑтам тухӑҫ кашни гектар пуҫне — 356,3 центнер.
Ял хуҫалӑх предприятийӗсенче, фермер хуҫалӑхӗсенче кӗр тыррисене вӑхӑтра акса хӑварма ҫӗр хатӗрлеҫҫӗ. Хальлӗхе 1155 гектар кӗрхи тулӑ акса хӑварнӑ.
Минзаит ЗАЙНУЛЛИН.