Пуҫаруллӑ проектсемпе усӑ курса ҫулсеренех округра чылай вырӑнсенче юсав ӗҫӗсем ирттернӗ, тавралӑха тирпей- илем кӗртнӗ. 2025 ҫулта та ку енӗпе нумай ӗҫ пурнӑҫланӑ, ӗҫсем малалла пыраҫҫӗ.
Кӑҫалхи сентябрӗн 12-мӗшӗнчен сентябрӗн 26-мӗшӗччен «Ниме — халӑх бюджечӗ» программӑпа ҫитес ҫул пурнӑҫлама палӑртнӑ проектсемшӗн сасӑлав пырать. Чӑваш Енре пурӑнакансем ҫӗршер сӗнӳ-проект панӑ. Вӗсенчен сирӗн чи кирлине, чи пӗлтерӗшлине суйласа илсе сассӑрсене памалла. Сасӑлав «Общественное голосование Госуслуги» платформӑра пырать. Патшалӑх пулӑшӑвӗсен порталне кӗрсе «Инициативные проекты», «Местные», «Проекты Комсомольского МО» тупмалла, проекта суйласа илсе «Поддержать проект», «Проголосовать» тесе ҫырнӑ ҫӗре пусса сасӑламалла.
Чи нумай сасӑ пуҫтарнӑ проектсене пурнӑҫлама 2026 ҫулта укҫа-тенкӗ уйӑрӗҫ. Хӑвӑр пурӑнакан вырӑн хӑтлӑланасси сиртен те нумай килет.
Чӑваш Республикин Пуҫлӑхӗн Олег Николаевӑн пуҫарӑвӗпе ҫитес ҫулхи проектсене пурнӑҫлама ытларах укҫа-тенкӗ уйӑрма палӑртнӑ.