Йӗрке хуралӗнче тӑрӑшакансен ӗҫӗ ҫӑмӑл мар. Ҫынсем урамсенче, обществӑлла вырӑнсенче пӗр хӑрамасӑр ҫӳреме пултарччӑр, пурте саккун йӗркине пӑхӑнса пурӑнччӑр тесе вӗсем профилактика ӗҫӗ ҫине пысӑк тимлӗх уйӑраҫҫӗ. Ҫак ӗҫре вӗсене курӑмлӑ пулӑшу кӳрекенсем — халӑх дружинисем. Нумаях пулмасть Комсомольскинчи этнобиблиотекӑра округра «Халӑх дружини» туса хунӑранпа 10 ҫул ҫитнине уявларӗҫ.
Мероприятие округ пуҫлӑхӗ Николай Раськин, РФ ШӖМӗн «Комсомольский» уйрӑмӗн начальникӗ Сергей Ласточкин, дружинниксем, вӗсен штаб начальникӗ Мария Илларионова, Комсомольски 2-мӗш вӑтам шкулӗн 7-мӗш кадетсен класӗ хутшӑнчӗҫ.
Валентина Боровкова пирӗн ҫӗршыври ирӗклӗ дружинӑн историйӗпе кӗскен паллаштарчӗ. Ҫак обществӑлла организацие XIX ӗмӗр вӗҫӗнчех туса хунӑ. 1991 ҫулта ӑна пӗтернӗ, 2000-мӗш ҫулсенче вара ҫӗнӗрен дружинӑсем йӗркелеме пуҫланӑ.
Николай Никандрович уява пынӑ дружинниксене округ территорийӗнчи йӗркелӗхе сыхлас ӗҫе пысӑк тӳпе хывнӑшӑн тав турӗ, чи хастаррисене: Мария Илларионовӑна, Алена Николаевӑна, Вера Сивкинана, Леонила Кудрявцевӑна, Ольга Матроскинана Хисеп грамотисемпе наградӑларӗ. Сергей Ласточкин пурне те Тав хучӗсем парса чысларӗ. Мария Илларионова халӑх дружинникӗсен ӗҫӗ-хӗлӗпе презентаци урлӑ паллаштарчӗ.
Мероприяти паянхи кун дружинниксем обществӑшӑн питӗ усӑллӑ ӗҫ тунине тепӗр хут кӑтартса пачӗ.
Валентина БОРОВКОВА.