Комсомольскинчи ЗАГС уйрӑмӗнче кӑҫалхи 9 уйӑхри кӑтартусене пӗтӗмлетнӗ.
Январь — сентябрь уйӑхӗсенче округӗпе илсен пурӗ 109 пепке ҫут тӗнчене килнӗ. Чи нумай ача Урмаел территори уйрӑмӗнче ҫуралнӑ. Ку тӑрӑхри ялсене кӑҫал 41 хутчен «аист» вӗҫсе килнӗ. Комсомольски территори уйрӑмӗнче те ача ҫуратакансем йышлӑ — 24. Ҫав вӑхӑтрах Аслӑ Ҫӗрпӳел, Александровка, Асанкасси, Кайнлӑк, Хырхӗрри территори уйрӑмӗсенче палӑртнӑ тапхӑрта 1 е 2 пепке ҫеҫ ҫуралнӑ. Палӑртса хӑвармалла, пӗлтӗрхи январь — сентябрь уйӑхӗсенче округӗпе 95 ача ҫеҫ ҫут тӗнчене килнӗ.
Шел пулин те, вилекенсен шучӗ пысӑк. Кӑҫалхи 9 уйӑхра 267 ҫын пурнӑҫран уйрӑлнӑ.
Куратпӑр ӗнтӗ, округра ҫуралакансен шучӗ вилекенсенчен чылай пӗчӗкрех. Ҫакӑн пек лару-тӑру пирӗн патра ҫеҫ мар, республикӑра та юлашки ҫулсенче уҫҫӑнах палӑрать. Ытларах чухне ҫакӑ ялта ҫуралса ӳснӗ ҫамрӑксем тӗрлӗ хуласенче, ҫав шутра республика тулашӗнче те, тӗпленме тӑрӑшнипе ҫыхӑннӑ. Ҫав вӑхӑтрах тутарсем йышлӑн пурӑнакан территори уйрӑмӗсенчи лару-тӑру савӑнтарать. Акӑ, Урмаел территори уйрӑмӗнче 32 ҫын ҫут тӗнчерен уйрӑлнӑ, ҫуралакансем вара, ҫӳлерех каларӑмӑр ӗнтӗ, — 41, Чӗчкен территори уйрӑмӗнче 12 ҫын вилнӗ, 12 пепке ҫуралнӑ. Чӑваш ялӗсенче пурӑнакансен те вӗсенчен тӗслӗх илсен лайӑх пулмалла.
Округра ҫемье ҫавӑракансем пӗлтӗрхипе танлаштарсан нумайланнӑ. Пӗлтӗрхи 9 уйӑхра 48 мӑшӑршӑн Мендельсон маршӗ янӑранӑ пулсан, кӑҫал 54 ҫемье чӑмӑртаннӑ. Пӗлтӗрхи ҫак тапхӑрта 44 ҫемье арканнӑ, кӑҫал кун пек тӗслӗхсем 27 ҫеҫ.
Ольга ФЕДОТОВА.