Аксельбантсемлӗ уяв кителӗсем тӑхӑннӑ ачасем самантӑн уйрӑмах пысӑк пӗлтерӗшне ӑнланса пӗр йӑл кулмасӑр сцена ҫинче тӳп-тӳрӗ стройра тӑраҫҫӗ. 29 шкул ачи присяга тытса кадетсен йышне кӗрет, шкул, Тӑван ҫӗршыв чысне яланах хӳтӗлеме, ыттисемшӗн тӗслӗх пулма тупа тӑвать… Октябрӗн 23-мӗшӗ Комсомольски 2-мӗш вӑтам шкулӗн историне чи пӗлтерӗшлӗ, паллӑ кунсенчен пӗри пек кӗрсе юлӗ.
Мероприятие муниципаллӑ округ пуҫлӑхӗ Николай Раськин, администрацин вӗренӳ пайӗн начальникӗ Наталия Комиссарова, Комсомольски тата Елчӗк районӗсемпе ӗҫлекен ҫар комиссарӗ Сергей Данилов, Германири тата Варшава килӗшӗвӗн ҫӗршывӗсенчи Совет ҫарӗсен ушкӑнӗн ветеранӗсен Чӑваш Республикинчи Ассоциацийӗн ертӳҫин ҫумӗ Юрий Филиппов, ҫак ассоциацин вырӑнти уйрӑмӗн председателӗ Николай Смирнов, округри ветерансен Канашӗн председателӗ Юрий Тимофеев, кадетсен ашшӗ-амӑшӗсем тата ыттисем те хутшӑннӑ.
Шкул директорӗ Евгений Савельев тата уява пуҫтарӑннӑ хӑнасем кадетсене присяга тытнӑ ятпа ӑшшӑн саламланӑ, шкул, тӑван округ ятне яланах ҫӳлте тытма суннӑ. Тин кадетсен ретне тӑнӑ ачасем сцена ҫинче гранд-марш ташлани уява уйрӑмах илем кӳнӗ.
Октябрӗн 24-мӗшӗнче ҫакнашкал уяв Комсомольски 1-мӗш вӑтам шкулӗн 5-мӗш класс ачисемшӗн те иртнӗ. Вӗсем те присяга тытса ҫӗршыва юрӑхлӑ ҫынсем пулма тупа тунӑ.
Кадет пуласси — питӗ пысӑк яваплӑх. Кадетсен хӑйсен кашни утӑмӗшӗн, кашни каланӑ сӑмахӗшӗн явап тытма пултармалла, пӗр-пӗрне яланах пулӑшма хатӗр пулмалла, Тӑван ҫӗршыва юратмалла. Пирӗн округри ачасем те кадет ятне чыслӑн упрасса, тӗрлӗ енсенче палӑрасса, малашне хӑйсен ҫитӗнӗвӗсемпе округ аталанӑвне те тӳпе хывасса шансах тӑратпӑр.
Наталья Калашникова.