Пӗр синкерлӗ кун Чечен Республикинче служба командировкинче пулнӑ ентешсем инкеке лекнӗ. РФ ШӖМ уйрӑмӗн территорине кӗме тытӑннӑ террорист хӑйне хӑй сирпӗтсе янӑ. Унпа пӗрле Чӑваш Енри полицин икӗ ӗҫченӗн — Александр Егоровӑн тата Валерий Пучковӑн пурнӑҫӗсем татӑлнӑ.
Ҫак кунсенче Анат Тимӗрчкасси ялӗнче Чечен Республикинче пуҫне хунӑ Александр Егорова асӑнса футбол турнирӗ ирттернӗ. А.Егоров аслӑ сержант 2013 ҫулхи сентябрь уйӑхӗнче пурнӑҫран уйрӑлнӑ. Вилнӗ хыҫҫӑн ӑна Хӑюлӑх орденӗпе наградӑланӑ.
Мероприятие Комсомольски муниципаллӑ округ пуҫлӑхӗ Николай Раськин, РФ Ш,Мӗн полицин патрульпе пост службин Шупашкарти батальон командирӗ Ярослав Игнатьев, Чӑваш Республикинчи обществӑлла йӗркене хӳтӗлекен управленин начальникӗ Николай Григорьев, ШӖМ управленийӗн канашӗн ветеранӗ Сергей Федоров, Тукай территори уйрӑмӗн начальникӗ Светлана Кондратьева, Александр Егоровӑн пӗрремӗш учителӗ Мария Григорьева, амӑшӗ Нина Егорова, тӑванӗсем, ҫывӑх ҫыннисем, юлташӗсем, пӗр класра вӗреннисем хутшӑннӑ.
Турнирта пурӗ 6 команда тупӑшнӑ. Хӗрӳ вӑйӑра куҫса ҫӳрекен кубока полицин патрульпе пост службин ӗҫченӗсем тивӗҫнӗ. Иккӗмӗш вырӑнта — «Гигант» команда, виҫҫӗмӗшӗнче — «Тимерчеево». Ҫӗнтерӳҫӗсемпе призерсем медальсене, грамотӑсене тата кубоксене тивӗҫнӗ.
(ХАМӐР ИНФ.).