Ачасем пирӗн пуласлӑх тетпӗр те, вӗсем телейлӗ ӳсчӗр тесе патшалӑх нумай тӑрӑшать. Кунсӑр пуҫне ҫӗршывра ыркӑмӑллӑх мелӗсем те анлӑ сарӑлнӑ. Июнӗн 1-мӗшӗнче Комсомольскинчи культурӑпа кану паркӗнче Пӗтӗм тӗнчери ачасене хӳтӗлемелли куна халалланӑ «Детство наше золотое» хаваслӑ мероприяти те «Аслисем — ачасене» ыркӑмӑллӑх акцине уҫнинчен пуҫланнӑ.
Уява килнисене малтанах муниципаллӑ округӑн администраци ӗҫӗсен управляющийӗ М.А.Илларионова, Чӑваш республикинчи хӗрарӑмсен союзӗн вырӑнти уйрӑмӗн председателӗ И.П.Ядрова саламланӑ, пурне те кӑмӑлтан савӑнса канма ырӑ кӑмӑл-туйӑм суннӑ. Ачасем муниципаллӑ округ пуҫлӑхӗ Н.Н.Раськин ҫак куна валли хатӗрленӗ пылак ҫимӗҫе тивӗҫнӗ.
Комсомольскинчи «Колосок», «Рябинушка», «Радуга», Урмаелӗнчи «Лейсан» ача сачӗсене ҫӳрекенсем, искусствӑсен шкулӗнчи «Островок» хореографи ушкӑнӗ, Комсомольски 2-мӗш вӑтам шкулӗнчи кадет класӗсенче вӗренекенсем тата ытти уйрӑм юрӑҫӑсем сцена ҫинчен савӑнӑҫлӑ юрӑсемпе ташӑсем парнеленӗ.
Уяв вӑхӑтӗнче пурне те савӑнтарнӑ ӗҫ-пуҫ пирки палӑртса хӑвармалла. Светлана Дмитриевапа хӗрӗ Илона супӑнь хӑмписем вӗҫтерсе ыттисене те илӗртнӗ. Вӗсем хыҫҫӑн ачасем ҫеҫ мар, ашшӗ-амӑшӗ те ҫак «вӑййа» хӑпартланса хутшӑнса хӑйсен ачалӑхне «таврӑннӑ».
Ачасен те, ашшӗ-амӑшӗн те ҫак кун тунсӑхлама, кичемленме май пулман.
Округри территори уйрӑмӗсенчи ялсенче те Пӗтӗм тӗнчери ачасене хӳтӗлемелли кун умӗн культура ӗҫченӗсем тата вӗрентекенсем тӗрлӗ мероприятисем йӗркеленӗ% вӑйӑсем, конкурссем, спорт ӑмӑртӑвӗсем…
Ҫак мероприятисем пурте ачасене юратнине, вӗсемшӗн тӑрӑшнине туллин ҫирӗплетеҫҫӗ. Апла пулсан ҫак кун пӗчӗккисен асӗнче чылайлӑха юлӗ.
Юрий Гаврилов.