Майӑн 28-мӗшӗнче эпир пирӗн ҫӗршывӑн чиккисене хӳтӗлекен, тӑшман тапӑнас пулсан чи малти ретре тӑракан хӑюллӑ та паттӑр ҫынсен уявне — Пограничниксен кунне паллӑ тӑватпӑр. Ҫак уява халалласа Комсомольскинче пограничниксен палӑкӗ умӗнче ятарлӑ мероприяти иртрӗ.
Унта муниципаллӑ округ пуҫлӑхӗ Николай Раськин, Комсомольски территори уйрӑмӗн начальникӗ Юрий Митюков, пограничниксен союзӗн вырӑнти уйрӑмӗн ертӳҫи Геннадий Филиппов, «Морское братство» организацин вырӑнти уйрӑмӗн председателӗ Евгений Орешкин, ГСВГ ветеранӗсен союзӗн ертӳҫи Николай Смирнов, ГСВГ ветеранӗ Петр Лапшин, ветеран-пограничниксем тата ыттисем те хутшӑнчӗҫ.
Тухса калаҫакансем паянхи кун ҫӗршыв чиккисене сыхласси питӗ пысӑк пӗлтерӗшлӗ пулни ҫинчен каларӗҫ, хальхи вӑхӑтра чикӗре тӑракансен хӑюлӑхӗ, яваплӑхӗ ҫӗршывӑн пуласлӑхӗ ҫине витӗм кӳнине палӑртрӗҫ, паянхи пограничниксене хӑйсен тивӗҫне чыслӑн пурнӑҫласа тӑван киле ыррӑн-сыввӑн таврӑнма сунчӗҫ.
Ҫитӗнекен ӑрӑва патриотла воспитани парас енӗпе хастар ӗҫлекенсене — Геннадий Филиппова тата Петр Степанова — Комсомольски округне туса хунӑранпа 85 ҫул ҫитнине асӑнса хатӗрленӗ медальпе наградӑларӗҫ. Ҫавӑн пекех Василий Яковлев, Александр Шамбулин, Анатолий Шагаров, Алексей Сорокин, Николай Михайлов, Владимир Матросов, Валерий Марков, Владимир Илларионов, Василий Краснов, Ферит Айнетдинов, Фидаил Адиев муниципаллӑ округ пуҫлӑхӗн Тав хучӗсене тивӗҫрӗҫ.
Шкул ачисем вӑрҫӑ ҫинчен юрӑсем шӑрантарчӗҫ, вальс ташласа ҫаврӑнчӗҫ. Мероприяти палӑк умне чечек кӑшӑлӗсем хунипе вӗҫленчӗ.
(ХАМӐР ИНФ.).