«Учитель тени вӗрентетӗп тени кӑна мар, учитель тени — вӗренетӗп тени», тесе каланӑччӗ пӗр ҫыравҫӑ. Чӑннипех те, педагогӑн ачасен умне тухас тесен нумай пӗлмелле, вӗсен кашни ыйтӑвне хуравлама хатӗр пулмалла. Ҫавӑнпа та учителӗн хӑйӗн те ӗмӗр тӑршшӗпех вӗренме тивет. Мӗн те пулин ҫӗннине пӗлес, ӑса хывас тесен вара семинарсемпе конференцисене, фестивальсемпе конкурссене хутшӑнмасӑр ниепле те май ҫук. Малалла аталанас тӗллевлисем ҫапла тӑваҫҫӗ те.
Акӑ, мартӑн 12—13-мӗшӗсенче Урмаел вӑтам шкулӗнче иртнӗ «Ҫулталӑк вӗрентекенӗ — 2024» республика конкурсӗн муниципаллӑ тапхӑрне округри 6 педагог хутшӑннӑ. Конкурс ҫулсерен шкулсенчи чи хастар та пултаруллӑ педагогсене пуҫтарать. Вӗсен кашнинех ӗҫтешӗсене каласа памалли тата жюрие мӗн кӑтартмалли пур.
«Ҫулталӑк учителӗ» конкурсӑн пӗрремӗш кунӗнче педагогсем «Урок» тата «Педагогика диктанчӗ» заданисенче хӑйсен професси шайне кӑтартнӑ. Иккӗмӗш кунӗнче вара унта хутшӑнакансем уроксенче анлӑ усӑ куракан меслетсемпе, ӑслайсемпе паллаштарса мастер-классем ирттернӗ. Ҫавӑн пекех шкул ачисемпе Раҫҫейри йӑлана кӗнӗ ӑс-хакӑлпа кӑмӑл-сипет хаклӑхӗсене сыхласа хӑварас тата ҫирӗплетес енӗпе ӗҫлекен патшалӑх политикин никӗсӗсем ҫинчен калаҫнӑ, уҫӑ уроксем кӑтартнӑ. Сумлӑ жюри членӗсем вӗрентекенсем ачасемпе хутшӑнма, вӗсем патне информаци ҫитерме тата пултарулӑх тӗллевне пурнӑҫа кӗртме пӗлнине хакланӑ, инновациллӗ тата оригиналлӑ педагогика шухӑшӗсене палӑртнӑ.
Конкурс пӗтӗмлетӗвӗсемпе Тукай Мишер вӑтам шкулӗнчи акӑлчан чӗлхин учителӗ Гузель Миназимовна Хайртдиновӑна округри «Ҫулталӑк вӗрентекенӗ — 2024» тесе йышӑннӑ. Комсомольски 2-мӗш тата Кӗҫӗн Ҫӗрпӳел вӑтам шкулӗсенче географи предметне вӗрентекен Светлана Васильевна Красновӑпа Нурзида Имаметдиновна Минетуллова иккӗмӗшпе виҫҫӗмӗш вырӑнсене йышӑннӑ.
Гузель Миназимовнӑн мартӑн 23—29-мӗшӗсенче конкурсӑн республикӑри тапхӑрне хутшӑнмалла пулӗ, ӑна ҫӳллӗ шайри тупӑшура ҫитӗнӳ тума ӑнӑҫу сунатпӑр.
Любовь ШУРЯШКИНА.