Ҫак кунсенче пӗтӗм Чӑваш ен Ҫӗнтерӳшӗн, малти линири боецсене, вӗсен тӑванӗсемпе ҫывӑх ҫыннисене пулӑшас тӗлӗшпе, мирлӗ вӑхӑт ҫиттӗр тесе кӗл тӑвать.
Маларах республикӑри мӗнпур мечетре кӗлӗсем иртрӗҫ, мӑсӑльмансем Ҫӳлти Турра ҫар ҫыннисене хӳтӗлеме, вӗсем ырӑ-сывӑ та тӗрӗс-тӗкел хӑвӑртрах киле таврӑнччӑр тесе йӑлӑнса ыйтрӗҫ.
Мартӑн 10-мӗшӗнче вара пӗтӗмӗшле кӗлӗ Чӑваш Енри православи тӗнне ӗненекенсене пурне те пӗрлештерчӗ. Ҫав кун пур храмсемпе чиркӳсенче те «Шурӑ тутӑрсем» акци иртрӗ. Ку ӑнлав Тӑван ҫӗршывӑн Аслӑ вӑрҫи вӑхӑтӗнче, хӗрарӑмсем фронтри салтаксем ҫинчен кӗлӗ тума храмсене пырсан, пуҫланса кайнӑ. Чӑваш Митрополийӗ, Чӑваш Енри хӗрарӑмсен союзӗ, ЧР Культура министерстви тата Чӑваш енӗн «Пӗрле» аталану фончӗ халӑх патне ҫакӑн пек пуҫарупа тухнӑ.
Ҫав кун Комсомольски муниципаллӑ округӗнче пурӑнакансем та айккинче юлмарӗҫ, мӗнпур чиркӳсенче мирпе тӑнӑҫлӑхшӑн кӗлӗсем ирттернӗ. Округ администрацийӗн пуҫлӑхӗ Николай Раськин Луцки чиркӗвӗнче иртнӗ молебена хутшӑннӑ. Комсомольскинчи «Вознесение Господня» храмра Таса Руҫе тӑнӑҫлӑх парнелеме ыйтса молебен иртнӗ. Унта ытти прихожансемпе пӗрле округри хӗрарӑмсен канашӗн председателӗ Инна Ядрова тата канаш членӗсем хутшӑннӑ. Хӗрарӑмсем чиркӗве шурӑ тутӑрпа килнӗ.
(Хамӑр инф.).