Асанкассинче пурӑнакан Мираида Евсеевнӑпа Николай Иванович Чижиковсем «бриллиант туй» — пӗрлешнӗренпе 60 ҫул ҫитнине паллӑ тунӑ.
Мӑшӑра саламлама Асанкасси территори уйрӑмӗн начальникӗн тивӗҫӗсене пурнӑҫлакан Николай Карпов тата ялти культура ҫурчӗн ӗҫченӗсем килсе ҫитнӗ.
Хисеплӗ ватӑсен ачалӑхӗпе ҫамрӑклӑхӗ ҫӑмӑл пулман. Вӑрҫӑ ҫулӗсем, арканнӑ ҫӗршыва ҫӗнӗрен ура ҫине тӑратни тата ытти пулӑмсем иккӗшӗн шӑпи ҫине те витӗм кӳнӗ. Ҫапах нимӗнле йывӑрлӑхсем те, пурнӑҫри пӑрӑнӑҫсем те хуҫман вӗсене.
Николай Асанкасси ялӗнче ҫуралса ӳснӗ, кӗтӳҫре ӗҫленӗ. Мираида — Хирти Выҫли ялӗнчен. Ҫамрӑксем Комсомольскинчи пӗлӗшӗсем патӗнче тӗл пулса паллашнӑ. Николай тӳрех ҫамрӑк хӗре килӗштернӗ. Ҫулталӑк хӗрпе каччӑлла ҫӳренӗ хыҫҫӑн 1964 ҫулхи февраль уйӑхӗнче вӗсем туй кӗрлеттернӗ, мартра Элпуҫ ял тӑрӑхӗнче ҫырӑннӑ. Туй хыҫҫӑн ҫулталӑк ҫурӑлӑха Иркутска ӗҫлеме тухса кайнӑ. Унтан яла таврӑнса ҫурт лартнӑ. Ҫапла ялти пурнӑҫ пуҫланса кайнӑ. Мӗн тивӗҫлӗ канӑва тухичченех колхозра ӗҫленӗ, пенси ҫулне ҫитсен те тӳрех ӗҫ пӑрахман. Ҫемьере яланах юрату, ӑшӑлӑх, килӗшӳ хуҫаланнӑ.
— Ыттисем пекех пурӑннӑ. Ӗҫленӗ, ачасене ҫитӗнтернӗ. Ҫаврӑнса пӑхма та ӗлкӗреймерӗмӗр, пӗрле пурӑнма пуҫланӑранпа ҫур ӗмӗр ытла та иртрӗ, — каласа парать Мираида Евсеевна.
Вӑл пахчаҫимӗҫ ҫитӗнтерекен бригадӑра, унтан дояркӑра вӑй хунӑ. Николай Иванович бригадӑра тата фермӑра ӗҫленӗ. Вӗсем 6 ача — 4 ывӑлпа 2 хӗр — ҫуратса ӳстернӗ. Халӗ вӗсен кашнин — ҫемье.
— Халь лайӑх пурӑнатпӑр. Пенси аван илетпӗр, килте ӑшӑ, хӑтлӑ, газ пур, килех шыв кӗрет. Ачасемпе мӑнуксем пире манмаҫҫӗ. Пирӗн 11 мӑнук. Выльӑх, паллах, унчченхи пек тытмастпӑр, анчах чӑхсем пур. Пахчаҫимӗҫ лартса ӳстеретпӗр. Ҫулсене пӑхмасӑр пурнӑҫран юлас мар тетпӗр. Пире саламлама килнисене пурне те пысӑк тав. Турӑ парсан, пӗрлешнӗренпе 65 ҫул ҫитнине те уявлӑпӑр, — пытармарӗ шанчӑкне кил вучахӗн ӑшшин управҫи.
Наталья КАЛАШНИКОВА.