Комсомольски территори уйрӑмӗ лаптӑкӗпе те, халӑх йышӗпе те округра чи пысӑкки. Вӑл 7 яла пӗрлештерсе тӑрать.
Граждансен пухӑвӗсем малтан ялсенче иртнӗ. Февралӗн 29-мӗшӗнче вара округ центрӗнче пурӑнакансем Комсомольскинчи культура ҫуртне пуҫтарӑннӑ. Территори уйрӑмӗн пуҫлӑхӗн ӗҫӗсене тӑвакан Ю.Митюков пуҫтарӑннисене ялсен социаллӑ демографиллӗ пурнӑҫӗпе паллаштарнӑ, иртнӗ ҫул тирпей-илем кӗртес енӗпе пурнӑҫланӑ ӗҫсем ҫинче чарӑнса тӑнӑ. Вӑл пуҫаруллӑ бюджет укҫи-тенки ялсенче чылай пӗлтерӗшлӗ объектсем тума май панине, ҫак енӗпе кӑҫал та ӗҫлес тӗллевлине асӑннӑ.
Комсомольски пӗрремӗш тата иккӗмӗш вӑтам шкулӗсен директорӗсем И.Соловьева тата Е.Савельев ачасене пӗлӳ парасси мӗнле шайра пулса пыни ҫинчен каласа панӑ. Комсомольски ялӗнчен суйланнӑ депутатсем В.Кополухинпа А.Журавлев суйлавҫӑсен ыйтӑвӗсене татса парас тӗлӗшпе тунӑ утӑмсем пирки сӑмах илнӗ.
Пуху вӑхӑтӗнче централизациленӗ больницӑн тӗп врачӗ И.Ефремова, РФ социаллӑ фончӗн округри клиент службин ертӳҫи Н.Юманова, 31-мӗш пушар чаҫӗн начальникӗ И.Ананьев, влаҫ тата ытти ӗҫ тӑвакан органсенче ӗҫлекен яваплӑ ҫынсем саккунсенчи ҫӗнӗлӗхсем ҫинчен каласа панӑ, граждансен ыйтӑвӗсем ҫине хуравланӑ.
Граждансен пухӑвӗн ӗҫне округ пуҫлӑхӗ Н.Раськин хутшӑннӑ, пуҫтарӑннисен ыйтӑвӗсем ҫине тӗплӗнрех хуравсем парса вӑл е ку проблема пирки ӑнлантарса панӑ. Ҫавӑн пекех вӑл округӑн обществӑлла пурнӑҫне хастар хутшӑннӑшӑн, унӑн аталанӑвӗшӗн чылай ҫул тӑрӑшнӑшӑн М.Федоровӑна, В.Пундякова, С.Ялакова юбилей медалӗсем парса чыс тунӑ. Ӳсекен ӑрӑва патриотизмла воспитани парас ӗҫе тӳпе хывнӑшӑн Г.Филиппов, Н.Смирнов, Ю.Тимофеев та наградӑсене тивӗҫнӗ.
Пуҫтарӑннисем пӗрле канашласа кирлӗ йышӑнусем тунӑ, малашне пурнӑҫламалли ӗҫсене палӑртнӑ.
Елена ЗАЙКОВА.