Иртнӗ ӗмӗрӗн 60-70 ҫулӗсенче ӳснӗ ачасен шухӑшлавӗ те, тыткаларашӗ те, интересӗсем те паянхисенчен пачах та уйрӑлса тӑнӑ. Вӑл вӑхӑтри шӑпӑрлансем ытларах уҫӑ сывлӑшра пулма юратнӑ. Хӗллехи шартлама сивӗсенче те Хӗл мучи чӗпӗтнине пӑхмасӑр тӑвайккинче ярӑннӑ, ҫуркунне юр кайса пӗтнӗ пӗтменех типсе ҫитнӗ вырӑнсенче вӑйӑсем вылянӑ. Ҫу кунӗсенчи каникулта колхоз ӗҫне хутшӑннӑ, пушӑ вӑхӑтра шывра чӑмпӑлтатнӑ, пулӑра ларнӑ…
Аслӑ Чурачӑк ялӗнче кун ҫутине килнӗ Коля Богатыревӑн та ачалӑхӗ ҫав вӑхӑтри ача-пӑчаран пӗрре те уйрӑлса тӑман. Кашни арҫын ача пекех техникӑпа интересленнӗ. Кӳршӗри Коля Кирилловӑн ашшӗ тракторпа ӗҫленӗ те, ял ҫывӑхӗнче пулсан ун патне час-часах кайса килнӗ. Тепӗр чухне «хурҫӑ ут» ҫине ларса ҫӳреме май килнӗ те, ку вӗсемшӗн пысӑк савӑнӑҫ пулнӑ. Шӑпах ҫав ҫулсенчех пурнӑҫне техникӑпа ҫыхӑнтарас ӗмӗт ҫуралнӑ та пулӗ. Сочиненисенче шофер пулас ӗмӗт пурри ҫинчен ҫырнине халӗ те астӑвать вӑл. Шкул ҫулӗсенчех юрӑ-ташӑпа ҫывӑх пулнӑ. Аслӑ Чурачӑк вӑтам шкулӗнче Г.И. Яковлев йӗркеленӗ хора ҫӳренӗ, концертсемпе тӗрлӗ ялсене те тухса ҫӳренине хӑпартланса аса илет. Юрӑ-кӗвӗ ун пурнӑҫӗнче кайран та тӗп вырӑн йышӑннӑ. Кичем е йывӑр вӑхӑтсенче хаваслӑ ҫемӗ ун чунне уҫса янӑ. Паянхи кун та Николай Богатырев Комсомольски культура ҫуртӗнче иртекен пӗр концертран та юлмасть. Ахальтен мар ӗнтӗ культура ӗҫченӗсем ӑна «Хисеплӗ куракан» ят панӑ.
Николай Порфирьевич хӑйӗн ачалӑхри ӗмӗтне пурнӑҫланӑ. Кунта тетӗшӗ Александр Тутар Республикинчи Васильевори автотранспорт техникумӗнче вӗренни те витӗм кӳнӗ пулӗ. 1969 ҫулта ялти шкулта лайӑх паллӑсемпе 8 класс вӗренсе пӗтерсен Николай та унтах малалла пӗлӳ илме ҫул тытать. Вӗреннӗ вӑхӑтра хамӑр районти «Сельхозтехника» пӗрлешӳре практикӑра пулать. Техникумра «техник-автомеханик» специальноҫне илнӗ хыҫҫӑн тӑван пулса тӑнӑ предприятиех килет. Ҫапла вара 1973 ҫултан унӑн пурнӑҫӗ Комсомольскинчи «Сельхозтехникӑпа» тачӑ ҫыхӑнать. Ӑна ҫул-йӗр хӑрушсӑрлӑхӗн инженерӗн должноҫне параҫҫӗ. Ҫав ҫулхи ноябрь уйӑхӗнче Н.Богатырев салтак тумӗ тӑхӑнать. Смоленск хулинче службӑра тӑнӑ вӑхӑтра хӑйне пур енӗпе те лайӑх енчен кӑтартать, яла килсе кайма отпуска тивӗҫет.
Ҫартан таврӑнсан та вӑл тӳрех юратнӑ предприятие ӗҫе вырнаҫать. Николай Порфирьевича ылмаштаракан (обменный) пункт заведующине ҫирӗплетеҫҫӗ. Ку вӑхӑтра юсавпа техника предприятийӗ аталанса пынӑ. Республикӑри тата ун тулашӗнчи ытти «Сельхозтехника» пӗрлешӗвӗсемпе тачӑ ҫыхӑнса ӗҫленӗ. Н.Богатыревӑн ӗҫӗ тӑтӑшах ҫулҫӳревсемпе ҫыхӑннӑ. Йӗпреҫе трактор-комбайн, Патӑрьелне МТЗ-80 трактор двигателӗсем юсаттарма илсе кайнӑ. Республикӑри ытти предприятисенче те трактор-комбайн пайӗсене юсанӑ. Вӗсенче те ун час-часах пулма тивнӗ. Районти колхозсен машинӑпа трактор паркӗ 1980 ҫулсен тӗлне татах та ӳссе, пысӑкланса пынӑ. Ҫавӑнпа та заказсем те нумай пулнӑ. Уй-хирти хӗрӳ тапхӑрсенче хамӑр патра тракторсене юсаса ӗлкӗрейменнипе Киров облаҫӗсенчи, Тутар республикинчи предприятисенчен те пулӑшу ыйтма тивнӗ. Николай Порфирьевич вӗсене ҫитсе трактор пайӗсене хӑвӑртрах юсаттарса килме тӑрӑшнӑ. «Сельхозтехника» педприятире вӑл 2001 ҫулччен вӑй хунӑ. Хастарлӑхпа пултаруллӑхшӑн вӑл чылай Хисеп грамотине, хаклӑ парнесене тивӗҫнӗ. 1978 ҫулта ӑна «Социализмла ӗҫ ударникӗ» паллӑпа наградӑланӑ.
«Сельхозтехника» пӗрлешӳ саланнӑ хыҫҫӑн Н.Богатырев пӗр вӑхӑт Комсомольскинчи «Водоканал» предприятире шыв тасатакан сооружени операторӗнче те ӗҫленӗ. Ун хыҫҫӑн А.Степанов предприниматель патӗнче ҫӑкӑр-батон изделийӗсем турттарнӑ ҫӗрте тӑрӑшнӑ. Канмалли кунсене, уявсене пӑхмасӑр куллен рейса тухса районти суту-илӳ предприятийӗсене продукципе тивӗҫтернӗ.
2014 ҫултанпа вӑл Комсомольски 1-мӗш вӑтам шкулӗнче зданипе сооруженисене пӑхса тӑраканра вӑй хурать. Кирек ӑҫта ӗҫлесен те Николай Пофирьевич хушнӑ ӗҫе кирлӗ пек пурнӑҫланипе палӑрса тӑнӑ. Хальхи ӗҫ вырӑнӗнче те ӑна хисеплеҫҫӗ.
Н.Богатырев 1977 ҫулта Йӑвашкел хӗрӗпе Нина Анатольевнӑпа ҫемье ҫавӑрнӑ. Вӗсем 45 ҫул ытла пӗр-пӗрне килӗштерсе пурӑнаҫҫӗ. Мӑшӑрӗ ӑна пур чухне те пулӑшса пыма тӑрӑшать. Мӑшӑрсем ялта 1984 ҫулта ҫурт лартнӑ. Паянхи кун та унта кайса ҫӳреҫҫӗ, тӗрлӗ ҫимӗҫ ҫитӗнтереҫҫӗ. Богатыревсене 4 мӑнукӗ савӑнтарать.
Николай Порфирьевич ҫак кунсенче 70 ҫул тултарчӗ. Апла пулин те хӑйне вӑр-вар тыткалать. Ӗмӗр тӑршшӗпех ӗҫре пулнӑ та, пянхи кун та алӑ усса ларма юратмасть, ӗҫе ҫӳрет.
Юрий Гаврилов.