Паян Раҫҫейре Пӗтӗм тӗнчери ҫамрӑксен фестивалӗ уҫӑлать. Сочири «Сириус» центра тӗнчери 180 ҫӗршывран 20 пин ҫамрӑк пуҫтарӑннӑ. Мартӑн 1—7-мӗшӗсенче Раҫҫейри 10 пин яш-кӗрӗм урӑх ҫӗршывсенчи тепӗр 10 пин тантӑшӗпе тӗлпулса калаҫӗ, пӗрле нумай мероприятие хутшӑнӗ.
Асӑннӑ фестивале Раҫҫей Президенчӗн Владимир Путинӑн пуҫарӑвӗпе йӗркеленӗ. Вӑл ҫӗршывсем хушшинчи туслӑха ҫирӗплетме пулӑшмалла. Фестиваль программи пуян: «Знание.Первые» марафон, «Россия на вкус» регионсен гострофестивалӗ, «Медиапрофи:публикуй,общайся,продвигай» ӗҫлӗ вӑйӑ, «Новые формы выставки» фестиваль, «Самая красивая страна» выставка, Илья Авербухӑн пӑр ҫинчи шоу…
Фестивалӗн тӗп программисем вӗҫленнӗ хыҫҫӑн мартӑн 10—17-мӗшӗсенче мероприятисем регионсене куҫӗҫ. Ҫамрӑксем 30 яхӑн хулари технологипе промышленность предприятийӗсенче пулса курӗҫ.
Фестивале Чӑваш Республикинчи ачасемпе ҫамрӑксен обществӑлла организацийӗсемпе пӗрлешӗвӗсен хастарӗсенчен тӑракан делегаци те хутшӑнать. Чӑваш Енти волонтерсем татах та маларах Сочире хӑйсен ӗҫне пуҫланӑ.