Иртнӗ эрнере администрацин ларусен залӗнче Украинӑри ятарлӑ ҫар операцине мобилизаципе тата контрактпа кайнӑ граждансен ҫемйисене социаллӑ пулӑшу парас ыйтусемпе ӗҫлекен Координаци центрӗн черетлӗ ларӑвӗ иртнӗ.
Ларӑва Комсомольски муниципаллӑ округӗн пуҫлӑхӗ Николай Раськин, унӑн социаллӑ ыйтусемпе ӗҫлекен ҫумӗ — вӗрентӳ пайӗн начальникӗ Наталия Комиссарова, Координаци центрӗн секретарӗ, Чӑваш Республикин Ӗҫлев министерствин «Комсомольскинчи халӑха социаллӑ пулӑшу паракан центрӗ» бюджет учрежденийӗн специалисчӗ Ольга Николаева, Комсомольски больницин тӗп врачӗн ҫумӗ Лариса Галкина, халӑха ӗҫпе тивӗҫтерекен центрӑн ертӳҫи Екатерина Жукова, социаллӑ хӳтлӗх пайӗн начальникӗ Ирина Долгова хутшӑннӑ.
Ольга Николаева ларӑва хутшӑнакансене Комсомольски округӗнчи Координаци центрӗн ӗҫ-хӗлӗпе паллаштарнӑ. Вӑл асӑннӑ категорипе ӗҫленӗ май сиксе тухакан ҫивӗч ыйтусем ҫинче чарӑнса тӑнӑ.
«Ятарлӑ ҫар операцине хутшӑнакансен ҫемье членӗсен социаллӑ тата йӑлари проблемисене вӑхӑтра татса парасссине, мӗнпур ыйтӑва оперативлӑ пӑхса тухассине тивӗҫтересси ҫине уйрӑмах тимлӗх уйӑрмалла», — палӑртнӑ Николай Никандрович.