2023 ҫулхи ноябрӗн 1-мӗшӗнчен пуҫласа 30-мӗшӗччен шкул театрӗсен Чӑваш Енри Телейлӗ ачалӑх ҫулталӑкне халалланӑ «АСАМ» фестивалӗн республикӑри тапхӑрӗ иртӗ.
Малтанах сумлӑ жюри округсенче мала тухнӑ коллективсем ӳкернӗ видеосене пӑхса тухса хаклӗ. Республика тапхӑрӗнчи финалистсен постановкисене Чӑваш Республикин культура учрежденийӗсен сцена площадкисенче пӑхса тухӗҫ.
Пирӗн округран финала Ҫӗнӗ Мӑрат вӑтам шкулӗн вӗренекенӗсем хутшӑнӗҫ. Аса илтеретпӗр, «Дебют» шкул театрӗ «Память живет» историллӗ постановкӑпа округ тапхӑрӗнче гран-при ҫӗнсе илнӗччӗ. Вӑл 1942 ҫулхи ӗҫсем ҫинче никӗсленнӗ. Унта Вутланри ача ҫуртне блокадӑри Ленинградран тата ытти хуласенчен эвакуациленӗ ачасен пурнӑҫне сӑнланӑ.
Ҫамрӑк артистсене республика тапхӑрӗнче ӑнӑҫу сунатпӑр.
Фаина МАТРОСОВА.