Нĕркеç ялĕнче пурăнакан Христиния Васильевна Индюкова 9 теçетке çула хыçа хăварнă пулин те хаçат-журнала алăран ямасть, республика, район хыпарĕсемпе кăсăкланать. Район хыпарçине те вăл çулсеренех çырăнса илет. Ахальтен мар Хресчук аппа — пирĕн чи ватă вулакансенчен пĕри.
Кинемей кун-çулне тăван тăрăхрах ирттерет: çакăнтах çуралнă вăл, çемье çавăрнă, ача-пăчаллă пулнă, ватлăх çулĕсем…. Пурнăç çăмхине сÿтес пулсассăн вара Хресчук аппан аса илмелли, каласа памалли пайтах. Ачалăхĕ вăрçă çулĕсенче иртнĕ, ашшĕ вăрçăран таврăнман, хура-шурне сахалах мар тÿснĕ хĕр. Петя шăллĕпе пĕр-пĕрне ăнланни нумай йывăрлăха çĕнтерме пулăшнă. Пĕве çитнĕ хĕре Мускава вербовкăпа илсе кайнине те кинемей куççульленмесĕр аса илеймест. Çулталăк ытла вĕсем Мускав хулинче строительство ĕçĕнче тăрăшнă.
Малалла вулас