Раççейĕн Тĕп саккунне — Конституцие — кĕртме сĕнекен тÿрлетÿсемшĕн сасăламалли кун хыçа юлчĕ. Район çыннисен те, çĕршывăн тÿрĕ кăмăллă тата яваплăх туйăмĕллĕ кашни çыннин пекех, июнĕн 25-мĕшĕнчен пуçласа июлĕн 1-мĕшĕччен сасăлав участокне пырса хăйсен гражданла тивĕçне пурнăçлама май пулчĕ.
Сасăлав вăрахлăхĕ коронавирус инфекцийĕ вăхăтĕнче чи малтанах çынсене хăрушсăрлăхпа тивĕçтерессипе тата участоксенче вĕсем йышлă пухăнассинчен асăрханассипе çыхăннă. Участоксенчи сĕтел-пукана, кабинăсене пĕтĕмпех дезинфекцилесе тăчĕç.
Сасăлава пыракансен ÿт-пÿ температурине виçрĕç. Унтан сасăлава хутшăнакансене пурне те маскăпа, перчеткепе тата авторучкăпа тивĕçтерчĕç.
Июлĕн 1-мĕшĕнче, сасăлавăн юлашки кунĕнче, Чăваш Республикинче Раççей Федерацийĕн Конституцине улшăнусем кĕртме 1162 сасăлав участокĕ ĕçленĕ, çав шутра пирĕн районта 39 участокра çынсем сасăланă.
Июлĕн 2-мĕшĕнчи ирхи 8 сехет тĕлне, малтанлăха шутланă хыççăн, районти 17681 суйлавçă сасăланă. Çакă сасăлава хутшăнма кĕртнĕ списокри çынсен 93,17 проценчĕпе танлашать.