Чӑваш Республикин Пуҫлӑхӗ Олег Николаев пуҫарнӑ «Сывлӑх патне утӑм» проект округра ӑнӑҫлӑ пурнӑҫланать.
Кӑҫал районти тӗп больница тухтӑрӗсемпе медицина сестрисем ҫынсен сывлӑхне тӗрӗслес тӗллевпе чылай ялта пулма ӗлкӗрчӗҫ. Ҫавна май округра 12 хутчен сывлӑх пункчӗ ӗҫленӗ, медицина ӗҫченӗсем 1613 ҫыннӑн сывлӑхне тӗрӗсленӗ.
Ҫак кунсенче черетлӗ сывлӑх пункчӗ Хырай Ӗнел ялӗнче ӗҫлерӗ. Пациентсен сывлӑхне терапевт, кардиолог, стоматолог, хирург тата ытти специалистсем тӗрӗслерӗҫ. Унпа пӗрлех ЭКГ, флюорографи тума, юн пама та май пулчӗ.
Ҫитес кунсенче вара медицина ӗҫченӗсем Кивӗ Сӗнтӗр (сентябрӗн 9-мӗшӗ), Йӑлмахва (сентябрӗн 12-мӗшӗ), Асанкасси (сентябрӗн 26-мӗшӗ) ялӗсене ҫитеҫҫӗ. Сывлӑха тӗрӗслеттерме васкӑр! Алевтина АНТОНОВА.