Ноябрӗн 10-мӗшӗ — Раҫҫей Федерацийӗнчи шалти ӗҫсен сотрудникӗн кунӗ. Ҫак ятпа республикӑра тӗрлӗ мероприятисем иртнӗ.
РФ Шалти ӗҫсен министерствин «Комсомольский» уйрӑмӗнче те вӑл кун правӑпа йӗркелӗхе сыхлакансемпе ветерансем пуҫтарӑннӑ. Округ пуҫлӑхӗ Николай Раськин вӗсене професси уявӗ ячӗпе ӑшшӑн саламланӑ, округра саккунлӑха сыхлас тивӗҫе туллин пурнӑҫласа пынӑшӑн, пурӑнакансен хӑрушсӑрлӑхне тивӗҫтернӗшӗн тав тунӑ. Округӑн обществӑлла пурнӑҫне хастар хутшӑннӑшӑн сотрудниксемпе ветерансене наградӑсемпе чысланӑ. Ҫавӑн пекех полици ӗҫченӗсемпе ветеранӗсене шалти ӗҫсен министерствин «Комсомольский» уйрӑмӗн начальникӗ Сергей Ласточкин, шалти ӗҫсен органӗсен ветеранӗсен округри совечӗн председателӗ Петр Лапшин тата ыттисем те салам сӑмахӗсем каланӑ.
Комсомольскинчи культура ҫурчӗ ҫумӗнчи «Каҫал» халӑх фольклор ансамбльне ҫӳрекенсем тата уйрӑм юрӑҫӑсем уяв кунне ҫепӗҫ юрӑ-кӗвӗпе хаваслӑх кӗртсе илемлетнӗ.
Шалти ӗҫсен министерствин «Комсомольский» уйрӑмӗ йӗркепе право йӗркине сыхлас енӗпе республика шайӗнче те лайӑх енчен палӑрса тӑрать. Малашне те вӗсен йывӑр ӗҫӗнче ӑнӑҫу ҫеҫ пултӑр.
(Хамӑр инф).