Иртнӗ эрнере округ администрацийӗн залӗнче ветерансен совечӗн анлӑ ларӑвӗ иртнӗ. Ӑна ветерансен совечӗн председателӗ Ю.С.Тимофеев уҫнӑ, вӑлах ертсе пынӑ.
Малтанах ветерансене РФ Шалти ӗҫсен министерствин «Комсомольский» уйрӑмӗнчи ветерансен совечӗн председателӗ П.В.Лапшин ҫамрӑксене ҫарпа патриотизмла воспитани парас енӗпе пурнӑҫланӑ ӗҫсемпе паллаштарнӑ. Шалти ӗҫсен «Комсомольский» уйрӑмӗн начальникӗ С.А.Ласточкин пирӗн округра телефон урлӑ ултав серепине ҫакланнӑ тӗслӗхсем пирки каласа панӑ, пурне те тимлӗрех пулмаллине асӑрхаттарнӑ. Германире тата Варшава договорне кӗрекен ҫарсенче службӑра пулнӑ ветерансен совечӗн председательне Н.И.Смирнова республикӑри шалти ӗҫсен ветеранӗсен «Честь, порядок и долг» медальпе наградӑланӑ.
1945 ҫулхи июнӗн 24-мӗшӗнче Мускавра Ҫӗнтерӳ парадне хутшӑннӑ ентешсем ҫинчен округӑн архив секторӗн тӗп специалисчӗ В.Н.Шингалова каласа панӑ. Ларура вӗсем пирки вырӑнти культура учрежденийӗсемпе шкулсенче мероприятисем йӗркелеме сӗннӗ.
Аслӑ Отечественнӑй вӑрҫӑ ветеранӗ, КПСС райкомӗн ветеранӗсен пуҫламӑш организацийӗн пӗрремӗш председателӗ, нумай вӑхӑт Комсомольскинчи культура ҫурчӗн директорӗнче, художество ертӳҫинче, культура пайӗн заведующийӗнче ӗҫленӗ М.В.Орлов ҫуралнӑранпа 100 ҫул ҫитнине асӑнса ура ҫинче пӗр минут шӑп тӑнӑ. Марс Васильевич Комсомольскинчи искусствӑсен шкулӗн пӗрремӗш директорӗ пулнӑ, Аслӑ Отечественнӑй вӑрҫӑн II степеньлӗ орденӗн, Мухтав орденӗн кавалерӗ.
Лару ӗҫне округ пуҫлӑхӗн пӗрремӗш ҫумӗ А.Г.Кузьмин хутшӑннӑ, ветерансен юхӑмӗн хастарӗсене В.Н.Курицынӑна, М.В.Мокеевӑна, В.Н.Хораськинӑна, В.Т.Яковлевӑна округ администрацийӗн Тав Ҫырӑвӗсене панӑ. Ветерансен совечӗн пуҫламӑш организацийӗсене ӑнӑҫлӑ ертсе пынӑшӑн Л.М.Тихонова (Ҫӗнӗ Шӑхран), Л.К.Кокшина (райпо), В.Н.Хораськина (муниципаллӑ округ администрацийӗ) республикӑри ветерансен совечӗн Хисеп грамотисене тивӗҫнӗ.
Лару пӑхса тухнӑ ыйтусемпе тивӗҫлӗ йышӑнусем тунӑ.
Людмила Тихонова.