Октябрӗн 18-мӗшӗнче Комсомольскинчи «Кӗтне» физкультурӑпа спорт комплексӗнче Комсомольски муниципаллӑ округ пуҫлӑхӗн Кубокӗшӗн территори уйрӑмӗсен командисем хушшинче чушкӑлла выляс енӗпе ӑмӑрту иртнӗ. Унта 60 ҫултан аслӑрах арҫынсемпе 55 ҫултан аслӑрах хӗрарӑмсем хутшӑннӑ.
Мероприятие уҫса муниципаллӑ округ пуҫлӑхӗн пӗрремӗш ҫумӗн — территорисене тирпей-илем кӗртес тата аталантарас енӗпе ӗҫлекен управленин начальникӗн тивӗҫӗсене пурнӑҫлакан Альберт Кузьмин пурне те лайӑх кӑтартусем тума, ӑнӑҫлӑн тупӑшма суннӑ.
Вӑйӑ хаваслӑ та кӑмӑллӑ иртнӗ. Хӗрарӑмсем хушшинче Людмила Макарова ҫӗнтерӳҫӗ пулса тӑнӑ. Светлана Ванюшкина — иккӗмӗш вырӑна, Татьяна Васильева виҫҫӗмӗш вырӑна тивӗҫнӗ. Арҫынсем хушшинче Нежеметдин Сахров чи пултарулли пулнӑ. Иккӗмӗш вырӑнта — Вячеслав Ефремов, виҫҫӗмӗшӗнче — Владимир Горбунов.
Командӑсем хушшинче те тупӑшу хӗрӳ иртнӗ. Асанкасси территори уйрӑмӗн команди чи ла-йӑх кӑтартупа палӑрнӑ. «Кӗтне» спорт шкулӗн команди пьедесталӑн иккӗмӗш картлашки ҫине хӑпарнӑ. Виҫҫӗмӗш вырӑнта — аслӑ ӑрӑвӑн «Кӗмӗл ӳсӗм» хутшӑну центрне ҫӳрекенсем.
Кашни ушкӑнри ҫӗнтерӳҫӗсене тата призерсене грамотӑсемпе, медальсемпе, хаклӑ парнесемпе чысланӑ. Ҫӗнтерӳҫӗ команда муниципаллӑ округ пуҫлӑхӗн Кубокне тата I степеньлӗ Диплома тивӗҫнӗ.
Шел пулин те, Александровка, Кайнлӑк, Хырхӗрри, Тукай, Урмаел, Шурут, Чӗчкен территори уйрӑмӗсем команда тӑратман. Малашне вӗсем активлӑрах пуласса шанатпӑр.
Василий ПУНДЯКОВ.